Фæрдгуытæ

Куырттаты комы Дæллагхъæуы цард фæстаг рæстæг тынг аивта. Уымæн алыхуызон аххосæгтæ ис. Нæ равдысты хъайтар Уаниаты Хъазыбеджы цæстытыл арæх ауайынц раздæры амондджын царды нывтæ…

Сылгоймаджы цардвæндаг хуымæтæг æмæ иууыл амондджын стæм хатт рауайы. Уæлдайдæр та, йæ цард йæ хиуæттæн куы снывонд кæны, уæд. Равдыст «Фæрдгуытæ»-йы хъайтар у ахæм сылгоймаг — Сунжæйы цæрæг Къæбысты-Мырзаганты Дибæхан.

Хæxбæcтæй быдырмæ чи ралыгъд хуыздæp царды фӕдыл, axæмты нымæц Ирыстоны, хъыгагæн, бирæ y. Хохы Карцайы цæpæг Гиоты бинонтæ та раздæхтысты горæтæй сæ райгуырæн къонамӕ. Хæxбæcты цард æнцон нæу, фæлæ се ‘рвылбоны куыстӕй райгонд сты. Фæcмон ницæyыл кæнынц.

Хæсты сывæллон Гæбуты-Зæнджиаты Валяйæн йæ цардвæндаг тынг зын рауад. Фæлæ баззад фæлмæнзæрдæ адæймагæй. Ныр 65 азы дæргъы кусы уыцы иу бынаты. Фæллой кæнынмæ зивæг нæ кæны. Уый йын хъару дæтты цæрынæн æмæ æрхæндæг хъуыдытыл фæуæлахиз уæвынæн.

Ныртæккæ фæсивæд хъæутæй хуыздæр цардмæ бæлгæйæ стыр горæттæм лидзынц. Темыраты Арсен та йæ цард æнæ хæхбæстæй нæ уыны. Аздæхти йæ фыдæлты зæхх Фæрæскъæттæм.

Адæймаджы хъысмæт фыст у, фæзæгъынц. Равдыст «Фæрдгуытæ»-йы хъайтар Дзодзиаты Цæрайы царды фæндаг хуымæтæг нæ разынд. Йæ зæрдæйы цавæр хъуыдытæ ис æмæ йæ хъысмæт зондахаст аразæг куыд рауад, уый тыххæй нын æргомæй радзырдта.

Рæсугъд æмæ фæрнæйдзаг у Ирыстоны зæхх. Йæ урссæр хæхтæй, сыр-сыргæнаг æхсæрдзæнтæй, абухгæ хæххон цæугæдæттæй, бæрзонд цъæх арвы риуыл цæргæсты уындæй. Уыцы алæмæты нывтæм æрвылбон дæр кæсы Хохы Дзуарыхъæуы цæрæг Дудиаты Æхсарбег дæр. Æрбынат кодта Ирыстоны рæсугъддæр кæмтты астæу æмæ æнтысджынæй цæуы амонды фæндагыл.

Дзгойты Маретæ райгуырди Джызæлы. Фæлæ Ольгинскæмæ куы смой кодта, уæдæй абонмæ йын ацы хъæуæй адджындæр нал ис. Сылгоймаг у фондз сывæллоны мад, æмæ йæ уыцы хъуыддаг кæны æппæтæй амондджындæр.

Хъæуы цæрын æнцон нæу. Фæлæ Дзæгойты Зæлинæ йæ сабибонтæй нырмæ ууыл ахуыр у. Сылгоймаг цардуарзаг у, æмæ йæ зындзинæдтыл фæтых вæййы, йæ зæрдæмæ сæ хæстæг нæ айсы.

Дур-Дуры цæрæг Тадеты Тæирæйæн йæ хъæубæсты адæм хи бинонты ад кæнынц. Æмæ куыннæ! 50 азы бæрц хъæуы амбулаторийы сæргълæууæгæй бакуыста. Хиуоны лæггад сæ се `ппæтæн дæр фæкодта. Æмæ йыл хъæубæсты адæм дæр афтæ иузæрдион уымæн сты.