12.05.2026 | Дæ райсом хорз, Ирыстон!

Ирон сылгоймаг цыфæнды сæрæн куы уа хæринæг кæнынмæ, уæддæр цалынмæ чъиритæ фыцыны сусæгдзинæдтæ нæ базона, уæдмæ йæхи æцæг æфсин схонын нæу. Рагæйдæр-иу уыцы зонындзинад чызг райста йæ мад, йæ та йæ нанайæ. Фæлæ ныртæккæ цард уыцы фæтк фæивта — алы хатт афтæ нæ рауайы. Æмæ уæд ахæм уавæры æнцонæй ссарæн ис кæрдзынтæ фыцыны алыхуызæн мастер-класстæ. Æппыныдзух йæ дæсныйад амоны Моурауты Марианнæ дæр. Кæд æмæ куыдæй райдыдта йæ æнæмæнгхъæуæг куыст, чи йын сахуыр кодта йæхи чъиритæ кæнын, уыцы фарстытæ йæм радтой «Дæ расом хорз, Ирыстон!»-ы амонджытæ. Марианнæ у нæ равдысты уазæг.
УФ ахуырады сгуыхт кусæг, РЦИ-А адæмон артист Карсанаты Мæхæмæты нæ республикæйы чи нæ зоны, ахæм адæймаг зын ссарæн у. Йæ цæрдæг цагъд æмæ зæрдиаг мидбылхудтæй йæ уайтагъд бахъуыды кæнæм. Мæхæмæт йæ доулийы зæлланг дунейы бирæ бынæтты фехъусын кодта. Дзæвгар рæстæг та йæ курдиат лæвар кæны рæзгæ фæлтæрæн. Æрæджы Мæхæмæтыл 80 азы сæххæст. Нæ уацхæссæг Къутæрты Аидæ бабæрæг кодта доулисты къорд, йæ гуырæнбоны фæдыл арфæ ракодта Карсаны-фыртæн, стæй райста доулийыл цæгъдыны цалдæр урочы дæр.