Иу хаттæй иннæ хатмæ уын программæ «Фæрдгуытæ»-йы раргом кæнæм хъæуккаг адæмы сурæттæ. Афтæ нæ хъайтар Битарты Беллæ-Верæйæн цымыдисаг канд йæ ном нæу. Иттæг хорз арæхсы гобеленыл нывæфтыдтæ кæнын дæр.

Гогаты Асланы бафæндыд йæ фыдæлты зæххыл æрцæрын æмæ дзы йæ миддуне æмæ зондахаст аивын. Йæ дзаумæттæ атымбыл кодта æмæ Цъæймæ араст. Йæ нысанмæ цæуыны хъуыддаг йæ къухы куыд æфты, уый нын йæхæдæг радзырдта.

Царды зын уавæртæ йæ зæрдæ кæмæн нæ фæтызмæг кодтой, уыдонæй иу у Хъантеты-Приты Римæ. Йæ удлæууæг та йæ кæстæртæ сты.

Тотиты Иринæ хæрзæрыгонæй смой кодта хъæумæ. Хъæууон цардимæ æппындæр зонгæ нæ уыд. Фæлæ йæ хистæртæ ахуыр кодтой. Ныртæккæ сылгоймаг, æнæ хæдзарон куыстытæй куыд цæргæ у, уый нал зоны.

Суададжы стыр хъæубæсты адæмы зæрдæ йæ æнувыд куыстæй чи балхæдта, йæ бинонты цардæн фидар æмæ рæсугъд бындур чи сæвæрдта, уыдонæй иу у Брытъиты Неля. Сси нæ рауагъд «Фæрдгуытæ»-йы хъайтар.

Хохы Карцайы цæры 92-аздзыд Бæгъиаты Ясон. Йе `рыгон бонтæй фæстæмæ йæм бæхæй хуыздæр ницы кæсы. Абон дæр ма йæ фæфæнды йæ Путæйыл саргъ баппарын. Не сфæлдыстадон къорд æм куы ссыди, уæд бацархайдта, æмæ бæхыл йæ хъæуы уынгты æруади.

Куыдзеты Елызбары цалдæр хатты бахъуыд йæ цæрæнбынатæй сыстын æмæ быдыры астæу ног хæдзар саразын. Фæлæ йæ уыцы зындзинæдтæ нæ асастой. Сæ фыдæнæн сси ноджы цардуарзагдæр æмæ зæрдæхæлардæр.

Алагираг Мæрзаганты Надеждæйыл сæдæ азæй фылдæр цæуы. Фæлæ ма йæ хъару йæхимæ кæй ис, уый бæрæг у йе сныхас æмæ йæ фезмæлдæй дæр. Цард æй стыхджын кодта, æви йын уый æрдзæй рахæсгæ миниуæг у?

Гъе, афтæ Нартау кадимæ фæцарди, æнусы сæрты ахызти Æлæгираг сæдæфондзазыдзыд Мæрзаганты Надеждæ.

Адæймаджы цард йæ алфамблайæ аразгæ у. Равдыст «Фæрдгуытæ»-йы хъайтар Бадриаты Æхсарбег уый бæлвырд зоны. Куыд хицæн кæны хъæуккаг адæймаг горæтагæй æмæ йæ хъуыдымæ гæсгæ, хъæздыг кæй схонæн ис? Уыцы фарстытæн æм ис йæхи дзуапп.

«Цард фыдæбонæй у. Æнæ уымæй ницы ис». Афтæ хъуыды кæны нæ программæйы архайæг, Алагиры цæрæг Быценты Ноннæ. Æрыгон сылгоймаг уый йæхи хъысмæтæй бавзæрста. Бирæ зындзинæдты сæрты ахизгæйæ, йæхимæ ныфс æмæ хъару ссардта кусынæн æмæ хæдзары къона хъахъхъæнынæн.