Хъæуы цæрын æнцон нæу. Фæлæ Дзæгойты Зæлинæ йæ сабибонтæй нырмæ ууыл ахуыр у. Сылгоймаг цардуарзаг у, æмæ йæ зындзинæдтыл фæтых вæййы, йæ зæрдæмæ сæ хæстæг нæ айсы.

Дур-Дуры цæрæг Тадеты Тæирæйæн йæ хъæубæсты адæм хи бинонты ад кæнынц. Æмæ куыннæ! 50 азы бæрц хъæуы амбулаторийы сæргълæууæгæй бакуыста. Хиуоны лæггад сæ се `ппæтæн дæр фæкодта. Æмæ йыл хъæубæсты адæм дæр афтæ иузæрдион уымæн сты.

Æрдз — не сфæлдисæг, зæхх — нæ дарæг. Уыцы хъуыддаг чи æмбары, стæй фыдæбон кæнын чи уарзы, зæрдæрухс дæр уый вæййы. Ахæм у елхотаг Бичерахты Эдуард. Куыд зæгъы, афтæмæй йæ цæхæрадоны алцыдæр зайы. Зæххæн йæ фарн куыд у, йæ бæркад дæр афтæ у.

Тохтиаты Алик йæ сывæллоны бонтæй нырмæ фæллой кæнын ахуыр у. Царды зындзинæдтæ баййæфта, фæлæ йæ зæрдæ баззади фæлмæн æмæ адæмуарзагæй. Йæ хъысмæт дæр мидисджын уымæн рауади.

Адæм хъæутæм цæуыннæ тырнынц, æмæ цæй аххосæй лидзынц сæ райгуырæн бынæттæй? Ууыл нæ программæ «Фæрдгуытæ»-йы хъайтар Сидахъаты-Беркъаты Зинæ рагæй сагъæс кæны. Ног Бæтæхъойыхъæуы цард фæстаг азты куыд аивта, уый тыххæй нын æргомæй радзырдта.

Хорз йæ бæллицаг зондахастæй арфæйаг вæййы канд йæ бинонтæ æмæ хæстæджытæн нæ, фæлæ ма æцæгæлæттæн дæр. Ирыстон та ахæм адæмæй хъæздыг у. Сæ иу – Заманхъулы цæрæг Кудзаты Уырысхан. Бæлас уидæгтæй хъæддых куыд вæййы, афтæ Уырысхан та йæ фæлтæрддзинад æмæ йæ къабæзтæй у хъаруджын. Кæд æмæ йыл 94 азы цæуы, уæддæр у мæсыгау фидар, æппæт мыггагæн та – ныфсдæттæг.

Хæххон хъæуты саразæн ис наукон центртæ, фæсивæдæн сæрмагонд скъолатæ. Уый фæрцы Ирыстоны сног кæнæн ис хъомысджын хъæууон хæдзарад. Афтæ нымайы Хъобаны цæрæг Хуызмиаты Измаил.

Цыфæнды адæймагæн дæр йæ царды зындзинæдтæ вæййы, фæлæ йæ зæрдæ фæлмæнæй се `ппæтæн нæ баззайы. Йæ миддуне чи бахъахъхъæдта, уыдонæй иу у нæ программæйы хъайтар Заводы поселочы цæрæг Гуымецъаты- Рубайты Ларисæ.

Ног Бæтæхъойыхъæу хъуыстгонд у æрмæст Ирыстоны нæ, фæлæ æппæт бæстæйы дæр. Фыццаджыдæр, йæ номдзыд æмæ хъæбатыр адæмæй. Ныр дæр дзы цæры бирæ кадджын хистæртæ, сæ иу — хæсты сывæллон, бинонтæ иугæнæг, кæстæртæн — зондамонæг Цъыккаты — Æлдаттаты Райæ.

Бутаты Виктор æгæрон уарзтæй уарзы йæ райгуырæн хъæу Црау. Кæд æмæ йын уыдис æндæр ранмæ цæрынмæ ацæуыны фадат, уæддæр æй нæ бафæндыд. Йæ сабибонтæ уæззау уыдысты. Хъæлдзæгæй дзы ницы федта. Фæлæ Виктор фæрæзта царды зындзинæдтæн æмæ йæ бон баци рæсугъд къахдзæфтæ акæнын.