Хохы цæрын зын кæй у, уый иууылдæр зонынц. Цардамæлттæ дзы адæм æрвылбоны фæллойæ кæнынц. Уый æххæстæй банкъардта Уæллаг Мызуйраг æрыгон лæппу Калоты Алан дæр. Ӕнæ фыдæбонæй йын йæ цард ад дæр нæ кæны. Йæ сабибонтæй фæстæмæ тырныдта йæ фидæн фæрогдæр кæнынмæ, бæллыдис хуыздæр цардмæ. Фæлæ иуахæмы бафиппайдта, йæ райгуырæн хъæу йеддæмæ цæрын кæй никуы базондзæн.

Не сфæлдыстадон къорд ацы хатт бабæрæг кодта Цыкола. Фысымтæ уыдысты Нигкоты бинонтæ. Нæ программæйы архайæг Керменыл 95 азы цæуы, фæлæ æгуыстæй иу бон дæр нæ бады! Бинонты хистæр нын радзырдта, куыстуарзондзинад цас хъару дæтты, уый.

11 азы размæ Бирæгъты Мæирбег йæ цард цæхгæр фæивта. Хохмæ ссыди æмæ Джимийыхъæуы æрцард йæ фыртимæ. Цæмæн равзæрста ахæм фæндаг æмæ æдзæрæг хъæуы хорзæй цы ссардта?

Ацы хатт нæ фæрдгуыты хал тæмæн скалдта Хъахъхъæдуры. Не сфæлдыстадон къорд бабæрæг кодта Къуымæллæгкаты Терезæйы бинонты. Цардæн йæ цин дæр, æмæ йæ зын дæр æххæстæй чи базыдта, ахæм адæймаг у. Йæ зæрдæйы бынат ис алкæмæн дæр. Уарзы хион-хæстæджы, кад кæны мыггагæн, иу бинонтау цæры йæ сыхæгтимæ. Уды тых та йын сфæлдыстадон куыст дæтты. Ауды æмæ мидварны хъæздыгдзинæдтыл æфтауы кæстæрты. Хонæм уæ, цæмæй сымах дæр йемæ базонгæ уат.

Уынал хонынц хурхæтæны бæстæ. Ацы æвзæрст бынат рагæй дæр зындгонд у йæ уæлдæф æмæ хъæздыг дыргъдæттæй. Æппæтæй фылдæр дзы, æвæццæгæн, Цæллагты мыггаджы минæвæрттæ цæрынц. Цæллагтæй у нæ программæйы архайæг дæр. Йемæ хæстæгдæр базонгæ ут.

Æмбалты Райæйы царды фæндæгтæ афтæ рауадысты, æмæ йæ фæстæмæ йæ райгуырæн хъæумæ æрбакодтой. Йæ дыууæ фырты куы нал сты, уæдæй фæстæмæ йæхи æрдæг адæймагыл нымайы. Фæлæ ма йын цы кæстæртæ баззад, уыдоны цинæй цæры, æмæ зындзинæдтæн сæттын нæ комы. Ноджы ма йæ фарсмæ æппынæдзухдæр ис йæ лæппуты æрдхорд Батрадз.

Цыколайаг Баликъоты Юрий цæры йæхи фæллойæ. Кæд йæ фæндæгтæ æнцон нæ рауадысты, уæддæр йæ хъысмæтæй разы у. Йæ бинойнаг Марусяимæ хъæрмудæй æнусы æрдæгæй фылдæр цæрынц. Йе ‘стырдæр хъæздыгдзинадыл та нымайы адæймагуарзондзинад.

Сылгоймаг кæм нæй, уыцы хæдзар лæгæт у! Афтæ хъуыды кæны Урсдоны цæрæг Æмбалты Виктор. Иунæг цæмæн у? Стæй йæ азты сæрты акæсгæйæ, цавæр хъуыдытæм æрцыд?

Даскъофы уынгты æртæцалхон мотоциклыл сылгоймаджы куы фенат, уæд æй зонут: уый у Мæргъиты Уарзетæ. Йæ машинæ балхæдта сæрмагондæй йæ куысты тыххæй. Ацæргæ адæмæн лæггад кæны 30 азы бæрц. Йæ хъару æмæ йын йæ сæрæндзинадмæ абон дæр ма бирæ æрыгæттæ бахæлæг кæндзысты.

Дур-Дуры хистæр кары адæм бирæ нал баззад. Сæ царды бынат ис циндзинадæн æмæ хъыгдзинадæн дæр. Фæлæ цыфæнды куы уа, уæддæр сæ хъæубæстыл сæ зæрдæ нæ ивынц. Алы бонæй дæр бузныг сты. Алы уалдзæгыл дæр цин бакæнынц. Нæ равдысты архайджытæ Цъопбойты Надя æмæ Дзарасуты Таисæ дæр уыдонмæ хауынц.