Сæрд фæззæгмæ куы фæхæстæг вæййы, уæд Дзæуджыхъæуы алы рæтты фæзынынц харбыз æмæ неситæ уæйгæнæн бынæттæ. Бирæты зæрдæмæ цæуы ацы гагадыргътæй ком æнтæф бон æруазал кæнын. Фæлæ сæ æвзарын дæр зонын хъæуы. Науæд, гæнæн ис, æмæ сæ адæймаг фæхъæстæ уыдзæн. Куыд сæ хъæуы хи хъахъхъæнын? Ууыл дзырдтам нæ уазæг дохтыримæ.
Афтæ ма нæ ныхасы сæр уыд ног ахуырадон-хъомыладон проект «Тропой Нартов. Наследие предков», зæгъгæ. Кусын ыл райдыдтой Дзæуджыхъæуы электроникæйы колледжы. Цæмæй къуылымпы ма кæной, уый тыххæй ма сын грант дæр рауæлдай кодтой. Цы у проекты мидис æмæ дзы цæмæ `нхъæлмæ кæсынц, уый та нын нæ уазджытæ радзырдтой.
Уæдæ, зæгъынц, кæрцæн йе `мпъузæн — йæхицæй. Нæ телекомпанийы комкоммæ эфирмæ цæуын райдыдта ног проект «Ирон чат. Æгайтма». Æххæст уыдзæн арфæтæй, ахсджиаг хъусынгæнинæгтæй, музыкæйæ, цыдæриддæр уын уæ зæрдæ рухс кæна, уымæй. Равдысты сфæлдыстадон къорды куыстæн æвдисæнтæ уыдзыстут къуырийы алы цыппæрæмы дæр боны 2 сахатыл. Цæмæй уæ цымыдис кæндзысты нæ кусджытæ, уый та сын сæхицæй базондзыстут. Æрбацыдысты нæм студимæ.
