Ивгъуыд азы фæсивæдон форум «Машук»-ы грантты фæрцы нæ республикæйы минæвæрттæ рамбылдтой 47 милуан сомы. Æрыгæтты хсæн ис ахæмтæ, ныридæгæн уыцы фæрæзты фæрцы йæ хъуыддаг кæмæн сырæзти, ахæмтæ. Сæ проекттæ баст сты алы къабæзтимæ. Ис дзы социалон æмæ культурон проекттæ дæр.
Цалдæр азы размæ дæр ма нæ республикæйы цæрджыты куы бафарстаиккам, дала фæндыр цы у, зæгъгæ, уæд нын дзуапп стæмтæ радтаиккой. Фæлæ йæ зæрдæ ирон культурæйыл кæмæн риссы, уыдоны фæрцы рæзын райдыдта адæмы цымыдисдзинад дæр национ музыкалон инструменттæм. Таучелаты Аллæ байгом кодта студи æмæ дзы алы кары адæймæгты ахуыр кæны музыкалон инструменттæй цæгъдыныл. Уымæй дæр ма — лæвар. Æрбынат кодтой раздæры туристон базæйы бæстыхайы. Куыд æм æрцыди уыцы хъуыды, æмæ цавæр æнтыстдзинæдтæ æфты йæ къухы ныридæгæн? Уымæй æрыгон зæрдæргъæвд чызджы йæхи бафæрсдзыстæм.