Фæрдгуытæ

Уынал хонынц хурхæтæны бæстæ. Ацы æвзæрст бынат рагæй дæр зындгонд у йæ уæлдæф æмæ хъæздыг дыргъдæттæй. Æппæтæй фылдæр дзы, æвæццæгæн, Цæллагты мыггаджы минæвæрттæ цæрынц. Цæллагтæй у нæ программæйы архайæг дæр. Йемæ хæстæгдæр базонгæ ут.

Æмбалты Райæйы царды фæндæгтæ афтæ рауадысты, æмæ йæ фæстæмæ йæ райгуырæн хъæумæ æрбакодтой. Йæ дыууæ фырты куы нал сты, уæдæй фæстæмæ йæхи æрдæг адæймагыл нымайы. Фæлæ ма йын цы кæстæртæ баззад, уыдоны цинæй цæры, æмæ зындзинæдтæн сæттын нæ комы. Ноджы ма йæ фарсмæ æппынæдзухдæр ис йæ лæппуты æрдхорд Батрадз.

Цыколайаг Баликъоты Юрий цæры йæхи фæллойæ. Кæд йæ фæндæгтæ æнцон нæ рауадысты, уæддæр йæ хъысмæтæй разы у. Йæ бинойнаг Марусяимæ хъæрмудæй æнусы æрдæгæй фылдæр цæрынц. Йе ‘стырдæр хъæздыгдзинадыл та нымайы адæймагуарзондзинад.

Сылгоймаг кæм нæй, уыцы хæдзар лæгæт у! Афтæ хъуыды кæны Урсдоны цæрæг Æмбалты Виктор. Иунæг цæмæн у? Стæй йæ азты сæрты акæсгæйæ, цавæр хъуыдытæм æрцыд?

Даскъофы уынгты æртæцалхон мотоциклыл сылгоймаджы куы фенат, уæд æй зонут: уый у Мæргъиты Уарзетæ. Йæ машинæ балхæдта сæрмагондæй йæ куысты тыххæй. Ацæргæ адæмæн лæггад кæны 30 азы бæрц. Йæ хъару æмæ йын йæ сæрæндзинадмæ абон дæр ма бирæ æрыгæттæ бахæлæг кæндзысты.

Дур-Дуры хистæр кары адæм бирæ нал баззад. Сæ царды бынат ис циндзинадæн æмæ хъыгдзинадæн дæр. Фæлæ цыфæнды куы уа, уæддæр сæ хъæубæстыл сæ зæрдæ нæ ивынц. Алы бонæй дæр бузныг сты. Алы уалдзæгыл дæр цин бакæнынц. Нæ равдысты архайджытæ Цъопбойты Надя æмæ Дзарасуты Таисæ дæр уыдонмæ хауынц.

Уынайлаг Цогойты Къоста горæты дæр ацард, фæлæ фæстæмæ йæ бинойнагимæ хъæумæ аздæхт. Цæмæн афтæ рауад, уымæй йын йæхи бафарстам

Адæймагæн йæ сывæллоны бонтæ йæ фидæныл дæр фæзынынц. Сечеры цæрæг Фидараты Феня зындзинæдты сæрты зарæджы фæрцы ахизы. Зарын та уарзы хæстон уацмыстæ. Афтæ йæм фæкæсы, цыма уæд йæ бастдзинад йæ фыдимæ фæтыхджындæр вæййы.

Дзобелаты Царицæ цæры Дзуарыхъæуы æмæ йæхи хоны амондджын. Йæ царды æппæтæй фылдæр уарзы йæ хъæбулты. Сæрыстыр сæ у. Царицæ зæрдæрухсæй балæууы алы хъуыддагыл дæр. Уырны йæ, адæймаджы амонд зæрдæйы ахастæй аразгæ кæй у, уый.

Кæддæры фæрнджын хъæу Зджыды, цард бирæ адæм. Абон ма дзы чи баззад, уыдон æй æндæр бынатыл нæ баивдзысты. Ахæм зæрдæйы ахаст ис нæ равдысты архайæг Æгъуызарты Мæирбегмæ дæр.