«Амыраны рухс» – афтæ хуыйны аивадон цау. Уый ахадгæ æвæрæн хæссы мадæлон æвзаджы райрæзтмæ. Мадзал баст у ирон драматургийы бындурæвæрæг Брытъиаты Елбыздыхъойы гуырæн бонимæ. Аразджыты ныхæстæм гæсгæ дзы архайыны фадат ис республикæйы алы районты сывæллæтты коллективтæн. Бирæ къордтæ дзы стыр сценæмæ рацыдысты фыццаг хатт. Ныронг ахæм фестивалы никуы архайдтой, æмæ сæм кæсы тынг цымыдисаг. Хæдахуыр актерты дæсныйад фенынмæ араст не сфæлдыстадон къорд дæр.
20 азæй фылдæр рацыд, фæсивæдон театр «Амыран» сценæйы æмбæрзæн фыццаг хатт куы байгом кодта, уæдæй. Фæлæ абон дæр студийы артдзæсты гуыры æмæ адæмыл рухс тауы сæ ирд аивад. Сæ хъæппæрисæй нæ республикæйы арæзт æрцыд сывæллæтты театрты фестиваль «Амыраны рухс». Аивадон цау саразыныл бацархайдтой фæсивæды хъуыддæгты фæдыл комитет æмæ театры минæвæрттæ.
Фестиваль сарæзтой дыккаг хатт. Æвзарæн туртæ вæййынц дыууæ къæпхæнæй – районты æмæ республикæйы. Сæ курдиат равдисыны бар ацы хатт уыд Дыгуры районы сабитæн. Къорайы театралон студийы сывæллæттæ цæхæрцæстæй архайынц сæ сурæтты æнкъарæнтæ театрдзаутæм бахæццæ кæныныл. Сæ ирд уæлæдарæс дæр уымæн æххуыс у.
Сывæллæттæ зæрдиагæй архайынц алы эпизоды дæр. Фестивалы домæнтæй иу у, цы спектакльтæ æмæ театралон скъуыддзæгтæ æвдисынц, уыдон цæмæй ирон æвзагыл уой. Аразджыты сæйрагдæр хæс у æвзонг артистты ирон драматургиимæ æмæ ирон театралон традицитимæ базонгæ кæнын. Уымæ та сæ разæнгард кæнынц сæ къордты разамонджытæ.
Фыццаг къæпхæны сæ курдиат раргом кодтой театралон студиты æмæ культурæйы галуанты минæвæрттæ. 500 адæймагæй æмæ 100 сфæлдыстадон къордæй фæфылдæр сты. Æвзонг артисттæн аргъ кодтой театралон æхсæнады минæвæрттæ. Фестивалы кæронбæттæны та уыдзæн гала-концерт Дзæуджыхъæуы.
