“Ӕз ницы аххосджын дӕн”, — загъта Рудольф Гесс тӕрхондоны. Уый уыд Гитлеры хӕдивӕг. 1941-æм азы атахт Великобританимӕ. Фæндыд æй, цӕмӕй англис нацистон Германиимӕ бафидауыныл сразы уа. Йæ нысан нӕ фӕрӕстмӕ, Гессы ӕрцахстой. Хӕсты кӕронмӕ уацары фӕци. Уый фӕстӕ йӕ радтой æппӕтадӕмон трибуналмӕ. Афтӕ сси Нюрнбергы процессы архайӕг. Советон Цæдис, Америкæйы Иугонд Штаттæ, Франци ӕмӕ Английы минæвæрттæ бӕлвырд кодтой нацистты ӕгъатырдзинад. Тӕрхондонӕн æвдыстой концлагерты тыххӕй документтӕ ӕмӕ кинонывтӕ.
Зылынгӕнджытӕ уыдысты прокурор Роман Руденко Советон Цæдисæй, профессор Франсуа де Ментон Францийæ, Роберт Джексон Америкæйæ, тæрхонгӕнӕг Джеффри Лоуренс Великобританийӕ. Дзырдтой немыцаг, французаг ӕмӕ англисаг ӕвзӕгтыл. Залы чи уыд, уыдон цыма 1945-æм азы фестадысты. Пайда кодтой æцæг историон документтӕй. Нюрнбергы процесс цыдис 1949-æм азмӕ. Йӕ фӕстӕ ныууагъта 40 томӕй фылдӕр гæххæттытæ. Тӕрхон ахаста 316 боны. Ӕгас дуне кастысты, нацисттӕ сӕ фыдракӕндтӕ сраст кӕнынмӕ куыд хъавыдысты, уымӕ. Спектакль-реконструкци бацӕттӕ кодтой Цæгат Ирыстоны паддзахадон университеты студенттӕ. Ӕххуыс сын кодта Мӕскуыйы паддзахадон лингвистикон университет. Проектыл куыстой тынг бирӕ рӕстӕг.
— Уазӕгуаты нæм цæут! Махæн кӕддӕриддӕр ӕхсызгон уыдзæн. Нӕ университеты æппынæдзух вæййы алыхуызон мадзӕлттӕ. Мӕскуыйы паддзахадон лингвистикон университеты дуӕрттӕ кӕддӕриддӕр гом сты нӕ иузӕрдион ӕмӕ ӕцӕг хӕлӕрттӕн. Стыр бузныг уын ацы ӕмархайды тыххӕй.
Мадзалы уыд национ политикӕ ӕмӕ ӕддагон бастдзинӕдты министр Бӕгъиаты Алан. Куыд фӕбӕрӕг кодта, афтӕмӕй спектакль ӕвдисы бӕстӕты ‘хсӕн ахастдзинӕдты ахсджиаг фӕрстӕ. Бафтыдта, ныртӕккӕйы политикон уавӕры сæйрагдæр кæй у патриоттӕ уӕвын. Адӕм хъуамӕ иудзинады тых ма рох кæной.
Нюрнбергы процесс сси цымыдисаг историон дӕнцӕг. Алыхуызон политикӕ ӕмӕ идеологиимӕ паддзахæдтæ баиу сты иу нысаны сӕраппонд. Фӕндыд сӕ дзыллӕты ӕмӕ гуманизмы принциптӕ бахъахъхъӕнын. Мадзалы ма раныхас кодтой республикӕйы алы дины ӕхсӕнадты раззагдӕртӕ.
— Нӕ адӕмы ‘хсæн бирӕ ис Фыдыбӕстӕйы Стыр хӕсты хъæбатыртæ. Уыимæ, намысы ордены ӕххӕст кавалертӕ ӕмӕ, йӕ хӕстон фӕндаджы тыххӕй бирӕ ӕндӕр ордентӕ ӕмӕ майдантӕ чи райста, ахӕм адӕймӕгтӕ.
— Абон сымах стут ӕвзонгдзинады рӕсугъд кары. Уӕ зӕрдыл бадарут нӕ Райгуырӕн бӕстӕйы истори. Хъахъхъӕнут ӕй ӕмӕ кӕрӕдзи уарзут. Уӕрӕсе кӕддӕриддӕр хицӕн кодта йе ‘нгомдзинадӕй.
Ацы спектакль у проект “Фыдыбӕстӕйы сӕраппонд уырнындзинадимӕ”-йы иу хай. Æххуыс у фӕсивӕдмӕ патриотизм рæзын кӕнынӕн. Аразы царды раст фæндаг ӕмӕ æмхиц кæны культурон хӕзнатӕм. Мадзалы программӕмӕ ма бахастой ӕндӕр цаутӕ дӕр. Уазджытæ федтой къамты равдыст “Дины ахадындзинад Стыр Уӕлахизы”. Уымӕй уӕлдай, эксперттӕ æрдзырдтой истори бахъахъхъӕныны ног мадзӕлттыл.
