161 азы абон сæххæст Хетæгкаты Къостайы райгуырдыл. Поэт, фыссæг, нывгæнæг, публицист. Ирон æвзаджы бындурæвæрæг. Къостайы ном æрымысынмæ ирон академион театры цур цы фӕз ис, уырдӕм æрбацыдысты республикæйы сæргълæууæг Битарты Вячеслав, хицауады уæнгтæ, фысджыты цæдисы минæвæрттæ, культурæйы къабазы кусджытæ, ахуыргæнджытæ æмæ скъоладзаутæ. Къостайы цыртдзæвæнмæ хастой дидинджытæ.
Мысæн мадзал сарæзтой Хетæгкаты Къостайы номыл Цæгат Ирыстоны паддзахадон университеты дæр. 1937 азæй нырмæ уæлдæр ахуыргæнæндон хæссы йæ ном. Поэты номæн дзы кæнынц стыр аргъ. Бæрæгбонмæ студенттæ бацӕттӕ кодтой ӕмӕ бакастысты Къостайы æмдзæвгæтæ. Универститеты бацæуæны йæ цыртдзæвæны цур сæвæрдтой дидинджытæ. ЦИПУ-йы президент, Мæхæмæтты Ахуырбег куыд фæнысан кодта, афтæмæй ирон адæмы культурæмæ Хетæгкаты Къоста бахаста æгæрон æвæрæн.
