34 азы рацыд Зары трагедийыл

Ирон адæмы историйы уæззаудæр цаутæй иу – Зары бæллæх. Абон дыууæ Ирыстоны мысынц трагедийы амæттæгты. 20-æм майы Гуырдзыстоны гæрзифтонг тыхтæ ныццагътой йæ цæрæнбынатæй чи сыстад æмæ Цæгат Ирыстонмæ мæлæтæй аирвæзынмæ чи лыгъд, уыдоны – æнæхæцæнгарз карджын адæмы, сылгоймæгты æмæ сывæллæтты. Цæгат Ирыстоны сæргълæууæг Сергей Меняйло куыд фæнысан кодта, афтæмæй кæд 34 азы рацыд, уæддæр уыцы уæззау фыдбæллæхы рыст нæ къаддæр кæны. Бирæ бинонтæн уый канд риссаг историон цау нæ, фæлæ хи хъæдгом у, байгас кæнæн кæмæн нæй, ахæм.