Президенты грантты конкурсы Цæгат Ирыстоны минæвæрттæ æппынæдзух архайынц. Ацы аз дзы фæуæлахиз сты нæ республикæйы 7 æнæкоммерцион куыстуаты. Æркастмæ æдæппæтæй æрбарвыстой 11 мин æхсæнадон хъæппæрисы 88 регионæй. Æхцайы æххуысы иумæйаг бæрц уыд 3,5 млрд сомы.
Сценикон аив дзырд, актеры дæсныйад, вокал æмæ æрмæст уыдон нæ. Алцыдæр профессионалон æмвæзадыл. Инклюзивон къордты скъола «Открытие»-йы ахуыртæ цæуынц ныр мæйы дæргъы. Ам, се ‘нæниздзинад хъыгдард кæмæн у, уыцы адæмæй иутæ хуыздæр кæнынц сæ ныхасы æууæлтæ, иннæтæ та фæлварынц сдзурын. Иууылдæр сæ гæнæнтæ уæрæхдæр кæнынц. Семæ кусынц дæсны педагогтæ.
Ахæм скъола байгом кæнын къухы бафтыд президенты гранты фæрцы, йæ бæрц — млн соммæ ввахс. Бархионтæ ӕмгуыст кӕнынц республикæйы Театралон архайджыты цæдисимæ иумæ. Фæнды сæ, цæмæй се ‘нæниздзинад хъыгдæрд кæмæн у, уыцы адæмæн сфæлдыстадон райрæзты гæнæтæ уа.
Ноджыдæр ма иу скъола, ам та ахуыр кæнынц фыццаг медицинон æххуыс бакæныныл. Фæсивæдæн лæвар ахуыртæ сарæзта Ирвæзынгæнджыты æппæтуæрæсеон студентон корпус. Проект райста грант 2,5 млн сомæн. Пъланы — мин адæймаджы сахуыр кæнын. Курсытæ амондзысты дæсны инструктортæ. Проекты ма ис дæсныйадæвдисæн ахуыртæ скъоладзаутæн. Ацæуæн сæ уыдзæн сентябры.
Терчы хъазахъхъы æфсады фæсивæды баиу кæнын у «Братство Терека» проекты сæйраг нысан. Куыстой йыл афæдз æмæ æрдæг. Архайджытæ — æфсадмæсидæн кары фæсивæд. Цæттæ сæ кæнынц Цæгат Кавказы федералон зылды хъазахъхъы бархион отрядтæм. Сæ фæлтæрддзинадæй сын фæхай кæндзысты сæрмагонд æфсæддон операцийы архайджытæ дæр. Уый тыххæй снысан кодтой сæрмагонд фембæлдтытæ. Сараздзысты цалдæр форумы.
Проект «Братство Терека» рамбылдта грант 5 млн сомæн. Президенты грантты фонды дыккаг конкурсы кæронбæттæн уыд ивгъуыд мæй. Фæуæлахиз дзы сты республикæйы 7 æнæкоммерцион организацийы.
