Афтӕ нӕ фыдӕлтӕ бӕрӕг кодтой сæ нæртон хъару, лӕгдзинад ӕмӕ фӕразондзинад. Фæсивæд хъазынц “ивазæнтæй”. Кӕрӕдзийы комкоммӕ æрбадынц, сӕ къӕхтӕ ныббыцӕу кӕнынц. Уый фӕстӕ ивазынц лӕдзӕг, цӕмӕй сбӕрӕг кӕной сæ тыхтæ. Ацы фӕзуат райсомӕй нырмӕ цӕттӕ кӕнынц базарадон-экономикон колледжы студенттæ. 16-аздзыд Костанты Фидар дӕр сфӕнд кодта ерысы архайын.— Мӕ зӕрдӕмӕ тынг фӕцыд ацы атмосферӕ. Ам бирӕ цымыдисаг хъӕзтытӕ ис. Ӕз мӕхӕдӕг архайдтон лӕдзӕг æмæ бӕндӕн æлвасыны, стæй уæзæгтæ истон.
Чысыл дарддæр — зиллакк ныв. Йӕ радиус — метр ӕмӕ ‘рдӕг. Ам — рагон “уæ хскæй къуырæн хъазт”. Лæппутæ сӕ къухтӕ сӕ фӕсчъылдым амбӕхсынц, сӕ иу къах сисынц ӕмӕ хъуамæ ныхмӕлӕууӕджы уӕхскӕй раппарой зиллаккӕй. Зӕххыл дыккаг къахӕй чи андзӕва, кӕнӕ хаххыл чи ныллӕууа, уый фӕхӕрд уыдзæн.
Ерысты фӕстӕ уазджыты се ‘ппӕты дӕр хонынц фынгтӕм. Раст фӕзуаты астæу базарадон-экономикон колледжы студенттæ скодтой 300 чъирийы.
Ӕппӕт ацы фӕзуӕттӕ, рагон хъӕзтытӕ ӕмӕ минас иу кӕны, сабибонтӕй фӕстӕмӕ алкæмæн дæр зынаргъ чи у, уыцы поэт. Парчы зӕлынц Къостайы æмдзæвгæтæ. Æнӕкӕсгӕйӕ сæ зонынц Ирыстоны ӕппӕт фӕлтӕртæ дæр.
Дæ номыл, дæ кадыл Нæ барын мæхи, – Ныууадз мæ мæ адыл, – Фæндон хорз кæм и?!.
Бӕрӕгбон сарӕзтой вице-премьер Алыбегты Эллӕйы хъӕппӕрисӕй. Мадзӕлттӕ иумӕ бацӕттӕ кодтой ахуырады министрад ӕмӕ культурӕйы министрад. Хистæрты уырны, ахӕм бӕрӕгбӕттӕ фӕсивӕдӕн кӕй ӕххуыс кӕнынц мадӕлон ӕвзаг хуыздӕр ахуыр кӕнын ӕмӕ традицитӕ бахъахъхъӕнынӕн.
Изӕрырдӕм — “Ирон хъазт”. Фӕндыры зӕлтӕм къӕйттӕ кӕрӕдзийы ивынц уæздан кафты.
Фӕлтӕрты ‘хсӕн бастдзинад тыхджын кæны. Æмæ цалынмӕ фӕсивӕд Хетӕгкаты Къостайы сфæлдыстад хъуыды кæной, уӕдмӕ поэт, æнæмæнг, иу кӕндзæн йӕ адӕмы.
