75 азы размæ, 9-æм октябры кæронмæ æрхæццæ, Фыдыбæстæйы Стыр хæсты рæстæг Кавказы цы карз тох цыд, уый. Советон салдæттæ немыцаг æрдонгты ныхмæ лæууыдысты афæдзæй фылдæр.
Кавказ Советон Цæдис ифтонг кодта хорæй, нефть æмæ æрдзон газæй. Уый тыххæй йæ немыцаг тыхгæнджытæй бахъахъхæнын уыд сæйраг хæс. Советон салдæттæн уый бантыст. Фашисттæн радтой æмбæлгæ ныхкъуырд. Кавказы тох у, дунеон историйæ рох чи нæ уыдзæн, ахæм цау. Уыцы рæстæг Советон салдæттæ цы хъæбатырдзинад æмæ лæгдзинад равдыстой, уый нырма бирæ фæлтæртæн уыдзæн фæзминаг. Ацы тох стыр Уæлахизмæ бахаста ахадгæ бавæрæн. Уыцы аз советон æфсад йæ тыхтæ æрæмбырд кодта æмæ райдыдта немыцаг фашистты дæрæн кæнын.
Мингай салдæттæ равдыстой хъæбатырдзинад Кавказы тохы. Бирæты дзы схорзæхджын кодтой “Кавказы хъахъхъæныны” майдантæй.