Абон æгас бæстæ бæрæг кæны Уæрæсейы тырысайы бон

Абон у Уæрæсейы Федерацийы Паддзахадон тырысайы бон. Бæрæгбоны фæдыл Цæгат Ирыстоны цæрджытæн арфæйы ныхæстæ ракодта республикæйы сæргълæууæг Сергей Меняйло. Куыд бафиппайдта, афтæмæй нæ бæстæйы тырыса нысан кæны фæлтæрты бастдзинад. Адæймаджы зæрдæйы гуырын кæны патриотон æнкъарæнтæ, разæнгард нæ кæны ног уæлахизтæм. Уымæн æмæ мах иууылдæр цæрæм æмæ фæллой кæнæм иу тырысайы бын! Æмæ абон, Уæрæсейы сахарты сæрмæ фæйлаугæйæ, нæ тырыса у Фыдыбæстæйыл иузæрдиондзинады, тых æмæ лæгдзинады, уæздандзинад æмæ намысы, историон традициты æнæфехæлгæ хæзнайы нысан. «Мæ зæрдæ уын зæгъы сыгъдæг арвы бын цæрын! Бæрæгбоны хорзæх уæ уæд!» – фæнысан кодта Сергей Меняйло.