Ацы бон ма 224 азы размæ бындур сæвæрдтой фыццаг æхсæнадон библиотекæйæн Уæрæсейы. Нæ бæстæйы национ библиотекæ Санкт-Петербурджы у æппæты зæронддæр Уæрæсейы. Фондты хъæздыгдзинадмæ гæсгæ та ахсы дыккаг бынат. Уæдæ æгас дунейы дæр нымад у информацион-библиографион кусæндæтты стырдæртæй иуыл. 1795-æм азы ус-паддзах Екатерина 2-аг бафыста паддзахадон æхсæнадон библиотекæ æмæ дунейы стырдæр чиныгæвæрæнтæй иу саразыны уынаффæ.
Бæстыхай арæзтой сæрмагондæй библиотекæйæн. Екатеринæ 2-аджы хъуыдымæ гæсгæ, национ библиотекæ хъуамæ равдыстаид Уæрæсейы тых, стæй рухстауынадмæ кæй тырны паддзахад, уый. Ног библиотекæ хъуамæ æрбамбырд кодтаид æппæт уæрæсейаг чингуытæ æмæ къухфыстытæ. Стæй æнæмæнг хъуамæ гом уыдаид æхсæнадæн. 1995-æм азæй нырмæ та президенты уынаффæмæ гæсгæ 27-æм майы фæбæрæг кæнынц библиотекæты Æппæтуæрæсейон бон.
