Адӕмон фронты активисттӕ раздӕр сбӕрӕг кодтой Хъесаты Астаны уынг. Ӕрӕджы ам æхсæнадон фæзуат сцалцӕг кодтой. Систой зӕронд асфальт ӕмӕ сӕвӕрдтой дурæй уæлцъар. Ноджы — ног бандӕттӕ ӕмӕ бырондæттæ. Адӕмон фронты уæнгты зӕрдӕмӕ фӕцыд куыстыты хӕрзхъӕддзинад.
Дарддæр бабæрæг кодтой Гагарины уынджы зындгонд парк. Йӕ фарсмӕ ис 44-ӕм скъола. Фæлладуадзæн бынат цалцӕг кодтой цалдӕр къӕпхӕнæй.
Ныртæккæ зилынц Терчы былмæ дæр. Ацы фæзуат у тынг стыр, уымӕ гӕсгӕ куыстытæ цæуынц цалдӕр къӕпхӕнæй. Специалисттӕ ног кӕнынц Чкаловы ӕмӕ Кировы уынгты ‘хсӕн хай. Пъланмӕ гӕсгӕ ноггонд æрцæудзæн ӕппӕт донбылгӕрон Сырхгвардион хидӕй Калинины уынгмӕ.
Активисттӕ æркастысты, Ӕппӕтуӕрӕсеон æвзæрстыты цы парктӕ ӕмӕ уынгтӕ рамбылдтой, уыдоны уавæрмæ. Ӕппӕт дæр сæ сцалцӕг кодтой “Горӕты хӕрзвадат тыгъдад аразыны” паддзахадон программæмæ гæсгæ. Объектты хӕрзхъӕддзинадӕн аргъ скӕнын бабар кодта республикӕйы сӕргълӕууӕг Сергей Меняйло. Ӕдӕппӕтæй Адӕмон фронты специалисттӕ бабӕрӕг кодтой 5 бынаты. Иннӕ къуыри ацӕудзысты бӕрӕггӕнӕг республикӕйы районтӕм.
