Мониторингы фыццаг объект — Дур-Дуры сывӕллӕтты рӕвдауӕндон. Адӕмон фронты уæнгтæ ардӕм ӕрцыдысты лӕвӕрттимӕ. Ӕрбаластой чингуытӕ, ахорӕнтӕ ӕмӕ хъазӕнтӕ. 2022 азы “Колосок”-ы кусджытӕ ӕххуысмӕ фӕсидтысты Адӕмон фронтмӕ. Зӕронд агъуыстытæ уыдысты заууат уавӕры: къултӕ афастысты, цар калди. Фарста алыг кодтой — сарӕзтой нырыккон бæстыхай. Ног рӕвдауӕндон байгом 10 сентябры “Хъӕууон фӕзуӕтты комплексон райрӕзты” паддзахадон программӕмӕ гӕсгӕ. Ис дзы 120 бынаты. Ныртӕккӕ йӕм цӕуынц 75 сабийы.
Ныртӕккӕ рӕвдауӕндоны кусы 4 къорды: эколята-дошколята, ӕвзонг кадеттӕ, шахмӕттӕ-шашкӕтӕ, стӕй полилингвалон ахуырад. Разамынды ма фæнды ноджыдӕр иу къорд байгом кӕнын, цӕмӕй сывӕллӕтты сӕ кармӕ гӕсгӕ адих кæной. Арæзтад къухы бафтыд хицауады ӕмӕ активистты иумӕйаг куысты фӕрцы.
Дарддæр — Хъарман-Сындзыхъӕу. 2021 азы ацы рæвдауæндоны уавæр дæр сæ хуыздæртæй нæ уыд. Фарста алыг кӕнын бантыст национ проект “Демографийы” фæрцы æмæ ам сарӕзтой ног бæстыхай. 5 къордæй алкæцыйы дæр ис нырыккон хъазӕн ӕмӕ хуыссӕнуæттæ. Федералон проект “Алы сывӕллоны æнтыстмæ” гӕсгӕ та сабитæ исынц уӕлӕмхасӕн ахуырад. Фӕлӕ ам дӕр разамындмӕ ис фарстатӕ алфамбылай фӕзуаты хӕрзвадаты фæдыл.
Мониторингы рӕстӕг Адӕмон фронты уæнгтæ сбӕрӕг кодтой кусӕндӕтты ӕдасдзинад, стæй гӕрзтӕхсӕн, хойраджы блоктӕ, музыкалон ӕмӕ физкультурон залты уавӕр. Цы аиппытæ рабӕрӕг кодтой, уыдон иууылдæр сæхимæ фæнысан кодтой.
Сӕйраг нысан у ӕрмӕст агъуыстыты уавӕр сбӕрӕг кӕнын нӕ, фӕлӕ, цӕмӕй алы сывӕллон дӕр рӕза ӕдас, хӕрзвадат уавӕрты.
