Цæгат Ирыстонæй абон сæрмагонд æфсæддон хæстæ æххæст кæнынмæ афæндараст кодтой мобилизацигонд æфсæддонты радон къорд. Дыууæ къуырийы ахуыртæ цыдысты Дзæуджыхъæуы, дарддæр ма фæлтæрддзинад райсдзысты Донецкмӕ хӕстӕг дæр. Ныфсы ныхæстимæ сæм расидтис Сергей Меняйло. Æфсæддонтимæ æмæ сæ бинонтимæ аныхас кодтой ме ‘мкусджытæ.
Алчидæр архайы йӕ фарсмӕ уӕвӕг адæймаджы уæлдай хатт æрбахъæбыс кæнын, йемæ къам сисын. Ахæм уавæры рæгъы лæууын дæр æнцон нæу. Æфсæддонтæн фæндагмæ бацæттæ кодтой тæвд чъиритæ.
Дыууæ къуырийы бæрц сæхи цæттæ кодтой Дзæуджыхъæуы. Ныр ахуыртæ цæудзысты Донецкы бын полигоны. Мобилизацигонд чи у, уыдонæй бирæтæм ис æфсæддон фæлтæрддзинад. Фæлæ, хи бацæттæгæнгæйæ, адæймаг бирæ фæныфсджындæр вæййы, зæгъынц фæсивæд.
Æфсæддонтæн фæндагмæ ныфсы ныхæстæ загъта республикæйы сæргълæууæг Сергей Меняйло. Куыд фæнысан кодта, афтæмæй тагъд рæстæджы семæ фембæлдзæн, сæрмагондæй æфсæддон операци кæм цæуы, уым. Аргъ скæндзæн уавæрæн.
Официалон хай æмæ арфæйы ныхæсты фæстæ æфсæддон рæгъмæ фыццаг тындзынц мадæлтæ. Зæгъынц, хъæбулы ауадзын зын у, фæлæ дæм Фыдыбæстæ фæдисы куы фæсида, уæд æмбæхсæн нæй.
Ныртæккæ Уæрæсейы æнæххæст мобилизаци кæронмæ æрхæццæ. 300 мин адæймагмæ æрсидыны хæс æххæстгонд æрцыд. Дарддæр — æрмæст бархионтæ æмæ, контракт бафыссын кæй фæнды, уыдон. Ацы лыстæгдзинæдтæ бынаты бамбарын кодта æфсæддон комиссары хæдивæг.
Фыццаг кæмæ æрсидтысты, уыдон ныртæккæ сты, сæрмагонд æфсæддон операци кæм цæуы, уым. Цы фæлтæрддзинад райстой, уымæй хай кæнынц, ногæй чи ныццыд, уыдонæн. Се ‘хсæн алы кары лæгтæ. Æрмæст сæ нысан иумæйаг — райгуырæн бæстæ æмæ уарзон адæмы бахъахъхъæнын.
