Цæгат Ирыстоны дарддæр цæуы националон культурæты æппæтадæмон фестиваль «Алтын Майдан». 300 архайæджы бæстæйы алы регионтæй. Этнологийы изæртæ, равдыстытæ, адæмон сфæлдыстады армукъатæ.
«Алтын Майдан» тæтæйраг æвзагæй ратæлмацгæнгæйæ нысан кæны «сызгъæрин фæз». Мадзал афтæ хуымæтæджы нæ рахуыдтой. Йæ нысан у — Уæрæсейы регионты культурон бастдзинад хъæддыхдæр кæнын. 300 архайæджы Хъæрæсе-Черкес, Татарстан, Саратовы облæст, Хъалмыхъ, Удмуртийæ. Цæгат Ирыстоны «Алтын Майдан» цæуы дыккаг хатт.
Фестивалы географи азæй азмæ уæрæхдæр кæны. Ирд æмæ хæдхуыз коллективтæ кæрæдзи зонгæ кæнынц сæ адæмыхатты культурæимæ. Уырыссаг, ирон, тæтæйраг адæмон кæфтытæ æмæ зарджытæ. Национ инструменттыл зæрдæмæхъаргæ цагъд. Аивады руаджы райгуырæн бæстæйы хъæздыг истори равдисын алкæй къухы дæр бафтыд.
Фестивалы архайджытæн арфæйы ныхæстæ загъта республикæйы фæллой æмæ социалон райрæзты министры хæдивæг Мамайты Анджелæ. Алы къорды курдиат дæр фæнысан кодта хицæнæй. Бирæнацион Уæрæсейы культурæимæ базонгæ уæвынæн ам æппæт фадæттæ дæр ис.
Фестивалы дыккаг бон сбастой этнологион конкурс «Æртхурон»-имæ. Зарджытæ, кæфтытæ, музыкалон инструменттæ. Ерыс кæнынæй, фестивалы архайджытæн ахсджиагдæр у сæ адæмыхатты культурæ ирдæй равдисын. Зæгъæм, ацы зæлтæ сты Хъалмыхъы фольклорæй.
Дæсныйадæвдисæн ахуыртæ, хæрзаудæн концерттæ, хъалмыхъаг, тæтæйраг, уырыссаг этнологийы изæртæ. Фестивалы директор Бестауты Георгийы ныхæстæм гæсгæ, культурон бастдзинады руаджы Дзæуджыхъæумæ цымыдис кæнынц туристтæ дæр.
Дарддæр республикæйы уазджытæм æнхъæлмæ кæсынц экскурситæ. Фендзысты Ирыстоны хæхтæ æмæ кæмттæ. Нæ культурæ æмæ æгъдæуттимæ базонгæ уæвгæйæ та, æнæмæнг кæй æрыздæхдзысты, уый дызæрдыггаг нæу.
