Ацы фæсивæдæй бирæтæ спортмæ хæрзæрæджы æрбацыдысты. Фæлтæрддзинад исын ныртæккæ райдыдтой. 9-аздзыд Максим Ткачев джиу-джитсуйæ архайы æрмæст афæдз æмæ æрдæг, фæлæ уыцы рæстæгмæ дæр йæхи хорз равдыста. Цæгат Кавказы федералон зылды ерысты рамбылдта сызгъæрин. Лæппу тырны ног уæлахизтæм.
Дзулаты Азæмæт та уыцы иу рæстæг архайы спорты дыууæ хуызы – джиу-джитсу æмæ къуххæст. Алы тохы фæстæ дæр базоны ног амæлттæ æмæ сæ æнæмæнг пайда кæны. Куыд зæгъы, афтæмæй тренировкæтæ кæнын хъæуы æрвылбон. Афтæ фылдæр æнтыстытæ бафтдзæн къухы.
Æрæджы нæ иугонд командæ йæхи æнтыстджынæй равдыста Цæгат Кавказы федералон зылды ерысты. Республикæмæ сластой 30 сызгъæрин майданы. Æмæ диссаг нæу, сæхи зæрдæргъæвдæй цæттæ кодтой. Милдзыхты Аринæ спорты ис 5 азы. Йæ къухы иу æмæ дыууæ уæлахизы нæ бафтыд, фæлæ уæддæр алы ерысты размæ дæр фæтыхсы.
Ныртæккæ командæ йæхи цæттæ кæны Уæрæсейы ерыстæм. Уыдзæн дзы 4 кары категорийы. Спортсментæн вæййы уæлæмхасæн тренировкæтæ дæр. Республикæйы джиу-джитсуйы федерацийы вице-предидент Дзитойты Артур куыд зæгъы, афтæмæй хорз физикон цæттæдзинад æнæмæнг у.
Джиу-джитсу Цæгат Ирыстоны æнтыстджынæй парахат кæны. Уæлдайдæр та файтинг. Раст зæгъгæйæ, спортсментæ экипировкæимæ къуылымпыдзинæдтæ æййафынц. Фæлæ сæ уæлахизмæ тырнындзинадыл зындзинæдтæ æппындæр нæ ахадынц.
