Æрæфы районы рынчындоны поликлиникæйы хайады ног рентген-аппарат ис. Цыппар азы размæ йæ самал кодтой сæрмагонд федералон проектмæ гæсгæ. Бонмæ процедурæ ацæуынц 15-20 адæймаджы. Æнæ къуылымпыйæ кусы флюорограф дæр. 20 азы размæ йæ самал кодтой, фæлæ йæ нымæцон хуызмæ раивтой. Район ма цух ййафы бынативгæ флюорографæй. Æмбæлгæ курдиат ивгъуыд аз арвыстой.
Æрæфы районы рынчындоны кусæг балцы республикæйы хицауады сæрдары хæдивæг Александр Реутов. Вице-премьер сарæзта бæстон æркаст: федта медицинон организацийы ифтонгад, дохтырты æмæ медционон кусджыты архайдæн аргъ скодта, аныхас кодта пациенттимæ. Биазырты Илитæ педиатрæй поликлиникæмæ фарон майы мæй æрбацыд. Кусы “Земский доктор” программæмæ гæсгæ. Хицауады сæрдарЫ ХÆДИВÆГ бафарста чысыл пациентты диспансеризацийы тыххæй.
Сæйраг дохтыр Бесолты Тамерланимæ федтой рынчындоны дзæбæхгæнæн хайæдтæ. Хирургийы ныртæккæ ис 26 пациенты. Терапийæйы дзæбæх кæнынц 32 адæймаджы. Хайады сæйраг дохтыр куыд радзырдта, афтæмæй сæ фылдæрмæ ис рæуджыты низтæ. Медицинон æххуысы хæрзхъæддзинадæй вице-премьер бафарста пациентты.
Дарддæры пункт – Быдыры Дæргъæвсы амбулатори. Сарæзтой йæ афæдз æмæ æрдæджы размæ «Здравоохранение» нацпроектмæ гæсгæ. Медицинон куыстуат ифтонггонд у æппæт хъæугæ кусæнгæрзтæй. Æппынæдзух бынатмæ æрцæуынц алыхуызон специалисттæ: терапевт, кардиолог, невролог. Æмткæй райсгæйæ амбулатори бонмæ бабæрæг кæны 10 адæймажы.
Уымæй уæлдай ма амбулаторийы самал кæнæн ис æнæмæнг хъæугæ хостæ. Нацпроекты фæлгæты ног фелсырон пункт фæзынд Советское хъæуы дæр. Бонмæ йæ бабæрæг кæны 15-20 адæймаджы. Æнæниздзинад хъахъхъæнынады объекттæ фенгæйæ, Александр Реутов фæнысан кодта фыццаградон фарстатæ. Уый пациенттæн æмбæлгæ лæггадтæ æмæ цæрджыты диспансеризаци.
Лыггæнинаг фарстатæ бынаты раиртасын æмæ сæ аиуварс кæнын. Ахæм кусæг балцыты республикæйы хицауады уæнгтæ вæййынц æппынæдзух æмæ сты пайда.
