Абон артаджы фæстауæрц республикæйы у 1 мин 700 тоннæйы – бензин æмæ 2 мин 500 тоннæйæ фылдæр – дизель. Фæндагыл ма ис 3 мин 500 тоннæйæ фылдæр артаджы дыууæ хуызы дæр. Уый тыххæй аппаратон ӕмбырды Сергей Меняйлойӕн фехъусын кодта цæрæнуатон-коммуналон хæдзарад, артаг æмæ энергетикæйы министр Хъараты Тимур. Маркæ «АИ-92»-ы бензин 50 тоннæйы республикæмæ æрбаласта “Газпром”. Регионы разамонæджы фæдзæхстмæ гæсгæ, бадзырд фыст æрцыд “Роснефть”-имӕ, цӕмӕй алы мӕй дӕр лӕвӕрд ӕрцӕуа уӕлӕмхасӕн 50 тоннӕйы бензин. Уый феххуыс уыдзӕн муниципалон скондтæ артагӕй сифтонг кӕнынӕн. Ныхас ма цыд эпидемиологон уавæрыл дæр. Республикæйы грипп æмæ коронавирусон инфекци бæрæггонд не ’рцыд. Æхснырсæгæй рынчынты нымæц скъолаты у 10%, сывæллæтты рӕвдауӕндӕтты -12%.
Уавæрмæ æппынæдзух цæст дарынц Роспотребнадзор æмæ ахуырад æмæ наукæйы министрад. Алыбегты Эллӕйы ныхӕстӕм гӕсгӕ, астӕуккаг профессионалон ахуырады кусæндæтты рауагъдонты 59% ӕнтыстджынӕй куысты бынæттæ ссардтой. Уымӕй уӕлдай, республикӕйы скодтой гом дуӕртты къуыри куыстдӕтджытимӕ, уыцы практикӕ адарддӕр уыдзӕн. Фæнд ма ис скъоладзауты æппæтуæрæсеон олимпиадæйы кæронбæттæн къæпхæн историйæ саразын. Уӕлдай ӕргом аздӕхтой фидӕны хъармгӕнӕн афонмӕ. Цæрæнуатон-коммуналон хæдзарады объектты техникон цæттæдзинад у 100%. Цæгат Ирыстоны ис 1 мин 223 бирæфатерон хæдзары центрон хъармимæ. Уыдонӕй гидравликон фӕлварӕнтӕ ацыдысты 928.
