Арæх фехъусæн вæййы, хæрзхъæд ахуырад æрмæст стыр горæтты райсæн ис, зæгъгæ. Фæлæ уыцы хъуыдыимæ Æрыдоны 3-æм скъолайы не сразы уаиккой. Ам æмдзу кæнынц ахуырадмæ сфæлдыстадон æркаст æмæ иумæйаг паддзахадон фæлварæнтæм цæттæ кæныны гæнæнтæ. Æнтыстдзинæдтæм фæндагыл скъоладзаутæн сæ фарсмæ сты фæлтæрдджын педагогтæ. Бæлвырддæр нæ дарддæры æрмæджы.
Кафгæйæ æмæ заргæйæ зонындзинæдты фæндагыл æнцондæр æмæ хъæлдзæгдæр у, – зæгъынц фæсивæд. Æрмæст ахуырадон процесс куыд нæ фæцуда, афтæ. Фæлæ йын уымæй тас нæу. Ам иумæйаг паддзахадон фæлварæны бæрæггæнæнтæ районы æппæты бæрзонддæр сты. Æрыдоны 3-æм скъола бахауд республикæйы 10 хуыздæр ахуыргæнæндоны хыгъдмæ.
Биологийæ нæм ис æппæты бæрзонддæр балл. 74 – уый рæстæсмбис нымадмæ гæсгæ, бæрæггæнæнтæм гæсгæ республикæйы уыд 60 баллы, æмткæй Уæрæсейы та 54,5 баллы, зæгъæн ис, æмæ махмæ тынг хорз хатдзæгтæ ис. Химийæ та уымæй бæрзонддæр – рæстæмбис балл уыд 78, республикæйы 62, Уæрæсейы 58.
Скъолайæн стыр æнтыстдзинæдтæ æрхастой ивгъуыд азы рауагъдонтæ. Чысыл уыдысты – 8 адæймаджы. Фæлæ сæ бæрæггæнæнтæ бирæ рауадысты. Цыппарæй дзы райстой майдантæ. Иууылдæр равдыстой бæрзонд баллтæ æмæ ахуыр кæнынмæ бацыдысты бæстæйы раззагдæр уæлдæр ахуыргæнæндæттæм. Ачеты Виктория та районы фыццаг у химийæ 100 баллы чи райста. Ныртæккæ ахуыр кæны Уæрæсейы Федерацийы æнæниздзинадхъахъхъæнынады медицинæйы уæрæсейаг университеты.
Уый ахæм чызг у, æмæ фыццаг къласæй 11-æм къласмæ ахуыр кодта æрмæст фондзтыл. Уыимæ ма 7-æм къласæй 11-æм къласмæ архайдта алы къæпхæны олимпиадæты. Скъолайæн иу æрхаста раззагдæр бынæттæ. Муниципалон æмвæзадыл 8-9 хатты сси фыццаг.
Скъола йæ рауагъдонтæй сæрыстыр у. Ацы аз фæнд кæнынц бæрæггнæнтæ ноджы фæфылдæр кæнын. Уымæн сæм æппæт уавæртæ дæр ис. Стыр хъомыс ис профилон кълæсты куыстæн. Бынаты сты 14: наукон, социалон-экономикон, медицинон, технологон æмæ æндæртæ.
Алыхуызон къордтæ сывæллæттæн æххуыс сты хи раргом кæнынæн, уыимæ ма сæхи раздæр цы къордты нæ фæлвæрдтой, уыдоны дæр. Уый пайда у профориентацион куысты дæр. Сывæллон хъуыды кæнын райдайы фидæны дæсныйадыл. Къордтæм бацæуыны бар ис алы ахуырдзауæн дæр, суанг ма не скъолайы чи нæ ахуыр кæны, уыдонæн дæр.
Туаты Валерияйы сабийæ фæстæмæ фæнды дохтыр суæвын. Каст медицинон конференцитæм, видео-уроктæм, архайдта дæсныйад æвдисæн ахуырты. Чызджы мад фармацевт у, фæлладуадзæн бонты иу Валерияйы куыстмæ арæх акодта. Радзырдта иу ын хосты тыххæй. Ныртæккæ чызг йæхи цæттæ кæны иумæйаг паддзахадон фæлварæнмæ, ахыр кæны хими, биологи, йæ бæллицмæ уæндон къахдзæфтæ кæны.
Сабийæ фæстæмæ мæ фæндыд дохтыр суæвын, ныр уый сси ме стырдæр нысан, ахуыр кæнынмæ бацæудзынæн Цæгат Ирыстоны медицинон академимæ.
3-æм скъолайы стыр куыст кæнынц, байгом дзы кодтой секцитæ, къордтæ æмæ иумæйаг паддзахадон фæлварæнмæ цæттæ кæнæн уæлæмхасæн кълæстæ. Алы ахуырдзау дæр æй бæлвырд зоны фидæны ахуыр кæнынмæ кæдæм бацæудзæн, уый.
