Ахуыргæнджытæ æмæ хъæомылгæнджыты профессионалон зонындзинæдты конкурсы муниципалон къæпхæн кæронмæ æрхæццæ. Æвзæрст æрцыдысты республикон æмвæзады æркасты архайджытæ. Хуыздæрты фæнысан кодтой Рахизфарсы районы дæр. Кадджын уавæры сæ схорзæхджын кодта Цæгат Ирыстоны ахуырад æмæ наукæйы министр Алыбегты Эллæ.
Сывæллоны зæрдæмæ фæндаг ссарын алкæй бон нæу. Фæлæ кæмæн бантысы, уый амондджын вæййы. Сæхиуыл банкъардтой профессионалон дæснайады конкурстæ «Хуыздæр ахуыргæнæг», «Хуыздæр хъомылгæнæг» æмæ «Педагогон дебют» -ы архайджытæ. Сæ цард скъолайæн, сабитæн снывонд кодтой æмæ аккагæй кæнынц сæ уарзон куыст. Сланты Маринæ педагогæй кусы 40 азы. Уыдонæй 4 азы у Беслæны сывæллæтты 8-æм рæвдауæндоны музыкалон разамонæг. Фыццаг къæпхæны лауреаты диплом райста республикæйы ахуырад æмæ наукæйы министр Алыбегты Эллæйы къухтæй.
Уæдæ Багаты Ибрагим та йæ дæсныйады фыццаг æнтыстджын къахдзæфтæ кæны. Заманхъулы скъолайы истори æмæ æхсæнадзонынады ахуыргæнæгæй кусы æрмæст 3 азы. Фарон сси «Педагогон дебюты» регионалон конкурсы уæлахиздзау. Ныр тырны ног бæрзæндтæм. Ацы аз йæ нысан у — «Хуыздæр ахуыргæнæджы» ном райсын. Сси уал муниципалон къæпхæны уæлахиздзау. Конкурсы муниципалон къæпхæны бацархайдтой 22 педагогы. Рахизфарсы районы æппæт скъолатæй. Æркаст цыд 3 къуырийы дæргъы. Уыцы рæстæгмæ нысангонд æрцыдысты гом уроктæ, фæсурок ахуыртæ. Педагогтæ равдыстой сæхи сæрмагонд методикон æрмæджытæ. Районы ахуырады управленийы методист Хъуысаты Эммæ хатдзæгтæй разыйæ баззад.
Конкурсы республикон къæпхæны районæй бацархайдзæн 8 адæймаджы. Се ‘хсæн ис бирæ æрыгон специалисттæ. Зæгъæм, Беслæны æртыккаг скъолайæ Дзæуджыхъæумæ ацæудзæн 2 минæвары.
Ныридæгæн конкурсы республикон къæпхæны ерыстæ сæ тæмæны бацыдысты. Ахуырады дæснытæ тох кæнынц сæйраг лæварыл. Сæрагдæр та —Уæрæсейы æмвæзады ерысты Цæгат Ирыстоны номæй архайыныл.
