Æфсæддон техникæйы æмæ хæцæнгæрзты нырыккон хуызтæ фенынмæ Алагиры цæрджытæй бирæтæ æрбацыд. Се ‘хсæн скъоладзаутæ æмæ студенттæ. Реуазты Никæ ахæм мадзалмæ фыццаг хатт саккаг кодта æмæ йæм бæстæйы хъахъхъæнынады æвдисæнтæ тыхджын æнкъарæнтæ раргом кодтой.
Сæрмагонд къорд “Булат” йæ арæхстдзинадæй уазджыты дисы бафтыдта. Уæлдай ирддæр та рауад автотранспорты алыварс æртыхсгæйæ фыдгæнæджы урæд.
Æфсæддонтæ сæ дæсныдзинад равдыстой алыхуызон хæслæвæрдты. Агуыридуртæ лыстæг мур кодтой тымбылкъухы цæфтæй. Æрбацæуджытæ уæлдай цин фæкодтой службæйон куыйты архайдыл. Уыдон иттæг хорз æххæст кодтой командæтæ, цæстыфæныкъуылдмæ иу ссардтой æмбæхст хæцæнгарз.
Уазджытæ базонгæ сты æфсæддон машинæтимæ, згъæрфидар транспортимæ, Уæрæсейы гвардийы техникæимæ, сæрмагонд дæлхайæдты æмæ тæрхондоны уынаффæтæ æххæст кæныны управленийы хæдтулгæтимæ. Уымæй уæлдай ма бынаты уыд хæцæнгæрзты равдыст. Акцийы кæронбæттæн уазджыты фæхуыдтой быдырон къæбицмæ салдаты касæй саходынмæ.
Æфсæддон-патриотон акци ацыд Фыдыбæстæ хъахъхъæнæджы боны кадæн. Алагирийы йæ ныридæгæн расидтысты дæсæм хатт. Мадзаларазджытæ – парти “Иугонд Уæрæсе” иумæйагæй районы администрациимæ.
