Се ‘ппæтæн зонгæ æмæ тыхджын девиз трибунæтыл зæлы. Футболуарзджытæ та радон хатт уарзон командæйы фарсмæ балæууыдысты. Ныр дыууын фондз азы фарсхæцджытæ «Алани»-имæ иумæ дих кæнынц уӕлахизты цин ӕмӕ маст дӕр. Дыгуры Алинӕ у фанаттӕй иу. Алайнаг фыранкты хъазтмæ фыццаг хатт бахауд цыппар азы размæ, фæхуыдта йæ йæ сæрыхицау. Ныртӕккӕ ӕнӕхъӕн бинонтӕй дӕр ацӕуынц мачтæм ӕмӕ æхсызгонæй вæййынц лӕппуты фарсмæ.
“Алайнаг фыранктæ” хуымæтæджы командæ нæу Хъæрджынты Людмилæйæн дæр. Ныр ӕхсӕз азы чызг ис фан-базӕйы. Фарсхӕцӕг сӕтты, клуб сси йӕ царды иу хай, æхсызгон æмæ цымыдисаг. Футболмӕ уарзондзинад æм сӕвзӕрд, Аланийæн Грознайы цы матч уыд, уый феныны фӕстӕ.
Алы уавӕры дӕр хи аккаг уагыл дарын. Алайнаг фыранктæ тырнынц, цӕмӕй “Алани”-йы фанаттӕ сӕрыстыр уой куыд клубы, афтӕ фарсхӕцджыты ‘хсӕн дӕр. Сӕ хъӕлӕстӕ хъуысынц ӕппӕты дарддӕр стадионты. Рæстæгимæ фан-клубы бирӕ ивддзинæдтæ ‘рцыд. Фӕлӕ ӕнӕивгæ баззад иу хъуыддаг — уарзондзинад ӕмӕ ӕгӕрон ӕнувыддзинад.
Август “Алани”-йы чи уарзы, уыдонӕн се’ ппӕтӕн дӕр суыдзæн историон цау. Фыццаг хатт командӕ ахъаздзӕн хæдзары йӕ ног фӕзы – стадион “Спартак”-ы. Уыцы цаумӕ Алайнаг фыранктæ сæхи рагацау цӕттӕ кӕнын райдыдтой. Фӕсивӕд сæ уарзон футболон клубæн равдисдзысты ирд программæ.
Ныртӕккӕ куыст йӕ тӕмæныл у. Сӕ тыхтӕ баиу кӕнгӕйӕ, ирон театры нывгӕнджытӕ Аланийы фарсхӕцджытимӕ иумӕ нывтимæ кæттæгтæ цæттæ кæнынц. Егъау баннер ауыгъд ӕрцӕудзӕн хъазт райдайыны размӕ стадион “Спартак”-ы. Ацы перфоманс, гæнæн ис, æмæ суыдзæн, Уӕрӕсейы стадионтӕ кӕй федтой, уыдонӕн сæ егъаудæр æмæ ирддæр цау.
