Атараты Георгий фембæлд Мæздæджы районы цæрджытимæ

Атараты Георгий фембæлд Мæздæджы районы цæрджытимæ. Видеобастдзинады ‘руаджы дзы архайдтой дзуапдæттæг ведомствоты разамонджытæ дæр. Притеречнæйы поселочы сæргълæууæг Нино Радушева куыд радзырдта, афтæмæй сæ хъæуы бындуронæй сцалцæг кодтой Культурæйы хæдзар æмæ амбулатори. Фæлæ культурæйы артдзæст хъæуы кæронмæ æмбæлгæ ифтонггæрзтæй баххæст кæнын. Вице-премьер сын зæрдæ бавæрдта, сæ фарста аиуварс кæнынæй. Мæздæджы цæрæг Габысаты Валерий та куры, цæмæй йын зæххы хæйтты арæнтæ сбæрæг кæныны фарста райхалыны фæдыл баххуыс кæной. Мæздæджы культурæйы хæдзары директоры ныхæстæм гæсгæ, объект хъæуы бындуронæй цалцæг кæнын. Фыццаджыдæр сног кæнын бæстыхайы сæр. Уарынты рæстæг ныккæнд донæй байдзаг вæййы. Хъуынайы аххосæй къултæ афаз сты, бæрзонд уымæлады тыххæй та мидæггаг пъолтæ нал бæззынц. Вице-премьер арæзтады министрадæн бабар кодта, бынаты уавæрмæ æркæсын æмæ фарстайыл бакусын. Зæрдæ бавæрдта, экспертизæйы фæстæ бæстыхыйы цалцæгыл бæстонæй кæй бакусдзысты.