Медицинон кабинеты – хуымӕтӕг куысты фæтк. Уыцы иу системӕ, фӕлӕ ахсджиаг хайимæ – аразгӕ интеллекты ӕххуысӕй. Аппарат фæлтæргай иртасы адӕймаджы буар. Дарддӕр къамтӕ бавгӕнынц программӕмӕ, уым сын аразгæ интеллект анализ скӕны цалдæр секундмӕ. Цӕттӕ иртасӕн куыстæн ис мæнæ ахæм хуыз.
Ацы ран кæсæм сӕры магъзы ишемиимæ рынчынмæ, аразгæ интеллект сырх хахх кӕны ишемийы ӕмӕ фыссы сӕрымагъзы рахиз хайы кæй ис, амоны егъау дадзины туджы бӕрц, ӕвдисы 54 милилитры, туджы ахст та бахахх кодта кæрдæгхуыз хӕххытӕй, ӕмӕ нын шкаламӕ гӕсгӕ дӕтты хатдзӕг. Пациентты стыр нымæцимæ, уый, æнæмæнг, ӕнцондӕр кӕны дохтырӕн йӕ куыст.
Аразгӕ интеллект раиртасы сӕры магъзы, риуыгуыдыры оргӕнты низтӕ, ноджы ма дзы пайда кӕнынц маммографион къамтӕ анализ кӕнгӕйӕ. Системӕ ссары тæссаг ивддзинӕдтӕ ӕмӕ специалисты æргом раздахы лыстæгдзинæдтæм, бæстондæр æркæсыны нысанимæ. Уый зынгӕ фӕбӕрзонддӕр кӕны куысты хъомыс ӕмӕ фӕкъаддӕр кӕны диагнозы рӕдыдтыты тасдзинад. Аразгӕ интеллект базоны инсульты, рӕуджыты ракы, пневмонийы ӕмӕ тарнизы миниуджытӕ. Алгоритмтӕ сӕхӕдӕг хынцынц рӕсыдты ас.
Аразгæ интеллектæй мах пайда кæнæм æртæ азмæ хæстæг. Нæ архайды нын хорз æххуысгæнæг у. Уæлдайдæр бирæ пациенттæ куы вæййы, уæд. Уæд нæ æнæмæнг хъæуы, уымæн æмæ ныртæккæ нырма иртасы сæрымагъзы рæуджыты низты миниуджытæ. Нæхæдæг гуырысхо куы фæкæнæм диагнозы рæстдзинадыл, уæд дзы спайда кæнæм.
Специалисттӕ фæнысан кӕнынц сӕйрагдӕр хъуыддаг — технологитӕ адӕймаджы нӕ баивдзысты. Кӕронбӕттӕн клиникон хатдзæг, дзӕбӕх кӕныны тактикӕ равзарын ӕмӕ терапийы снысан алкæддæр дохтыры бæрны вӕййынц. Нымæцон сервистӕ къабазы сты куыд ӕххуысгӕнӕг фæрæз. Абон республикӕйы ахӕм иртасӕн куыстыты хуызтæ сты 5. Программӕ йӕ ахадындзинад равдыста ӕмӕ йӕ уӕрӕхдӕр кӕндзысты.
Афӕдзы райдианӕй республикӕйы ныридӕгӕн скодтой 43 мин иртасӕн куыстӕй фылдӕр аразгæ интеллектæй спайда кӕнгӕйӕ. Архайд æххæст кӕнынц нацпроект “Дӕргъвӕтин ӕмӕ активон цард” -мӕ гӕсгӕ. Адӕмӕн ӕнцонвадат ӕмӕ нырыккон медицинон ӕххуысы райрæзт, абон – сӕ сӕйрагдӕр нысантæй иу у.
