Чызг аскъæфын худинаг у æви сæрæндзинад? Ахæм фарст, æвæццæгæн, уыцы фæнд чи скæны, уый æппындæр йæхимæ никуы радты. Хæрз дзæгъæлы! Æгъдау æмæ амондмæ кæй ницы бар дары æмæ уый тыххæй йæ хъуыдытæ чи нал загъта, ахæм нал баззад. Фæлæ, марадз, æма та куы иу ранæй, куы иннæ ранæй райхъуысы кæйдæр чызджы хъыллист, сæхи йыл цалдæр лæппуйы цъиусуртау куы ныццæвынц, уæд. Æмæ ма, Хуыцау хорз, машинæмæ æнæ уæнгсæстытæй куы бахæццæ уа, уæд. Фæлæ арæх уыцы мæгуыр чызгæй рауайы гæдыйы къуыбылой. Нæ уацхæссæг Брытъиаты Феликс дæр йæ тæккæ амондагургæ у. Ацыди чызджытыл цуан кæнынмæ. Æрмæст йæ хотых сау нымæт нæ, фæлæ видеокамерæ уыдис.
Амонд кæй къухмæ бахауы, уый йæ хъуамæ уадзгæ дæр мауал скæна. Ацы видеоскъуыддзæгты, æвæццæгæн, фырадæргæй æмæ фырцинæй разындысты лæппутæ иучысыл сонт. Фæлæ сын хатыр уæд. Уæвгæ, чызг аскъæфынмæ Ирыстоны фæстаг рæстæг арæхæй-арæхдæр бахæццæ вæййы хъуыддаг. Социалон хызæгты бонæй-бонмæ фылдæр кæнынц ахæм цаутимæ баст видеоæрмæджытæ. Сæ фылдæр сын сисынц Дзæуджыхъæуы. Роликтæ иу иннæйы фæдыл кæрæдзийы ивынц. Фæлæ адæм алыхуызон цæстæй кæсынц уымæ. Иутæ лæппуты сæрæнтыл нымайынц, иннæтæ та сын сæ дæндæгтæм æртхъирæн кæнынц. Растдæр уыдзæн, хистæры куы бафæрсæм, уæд.
