Хъӕбӕлоты Владимиры сабидуг ахахх кодта Фыдыбӕстӕйы Стыр хæст. 1941-ӕм азы, йæ райдианӕй дыууӕ мӕйы раздӕр, амард йӕ фыд. Мады иунӕгӕй бахъуыд 7 сывӕллоны хъомыл кӕнын. Немыцы ӕфсӕдтӕ Озрекмӕ куы бацыдысты, уӕд лӕппуйыл 6 азы йеддӕмӕ нӕма цыд. Оккупаци ахаста 3 мӕйы. Фашисттӕ бацахстой, зӕгъӕн ис, ӕмӕ ӕппӕт хӕдзӕрттӕ дӕр. Тас сси се ‘рвылбоны царды хай.
Иухатт Владимир йе ‘рдхорд Таймуразимӕ ссардтой гранат. Сывӕллӕттӕ партизантӕй хъазыдысты ӕмӕ тасдзинад не ‘мбӕрстой. Таймураз уæд бынаты фӕмард, чысыл Валодя та уӕззау цӕфтӕ фӕци. Диссаг, фервӕзын ӕй кодта немыцаг дохтыр. Афӕдзы ‘рдӕг лӕппу уыд цардӕй мӕлӕты’ хсӕн, йе схъисты иу хай ныр дӕр ма йӕ буары ис.
Хъӕу ссӕрибар кӕныны рӕстӕджы бомбӕтӕ нал ӕнцадысты. Мады бахъуыд йæ уӕззау цӕф фырты акъоппы ныууадзын, цӕмӕй иннӕ сывӕллӕтты ракӕна.
Уыдысты 7, 2 сæ — хӕрз чысыл, фаззæттæ. Фӕстӕдӕр амардысты. Уыцы рӕстӕджы-иу Владимиры æдасдæр ранмæ акодта йæ фыды ‘фсымæры чызг Хъӕбӕлоты Шуркӕ.
Хӕсты фӕстӕ цард ногӕй райдайын бахъуыд. Владимир каст фӕци скъола ӕмӕ пенсийы онг фӕкуыста цӕттӕгӕнӕгӕй. Ракуырдта Дарикъойы, бинонтæн райгуырд 2 сывӕллоны, ис сын 5 хъӕбулы хъæбулы æмæ уыдоны цот та — 3-йæ. Абон сабиты дадайыл цӕуы 91 аз.
Ноджы ма Владимир уӕлдай уарзон цӕстӕй кӕсы зӕхмӕ — зилы цӕхӕрадон ӕмӕ дыргъдонмӕ. Зӕгъы, фӕллой ӕххуыс у царды тых ӕмӕ цин бахъахъхъӕнынӕн. Хъӕбӕлойы-фырт — хæсты сывӕллон. Хӕст кӕй фехӕлдта, уыцы егъау бӕстӕ тагъд йӕ къахыл ахæм фидар адæмы фæрцы слæууыд. Ӕмӕ абон, Уӕлахизы Боны хӕдразмӕ, сӕ истори махæн хъуамæ уа зæрдылдарæн — сабырдзинады сæраппонд цы аргъ бафыстой, уымæн рохгæнæн нæй!
