Дигорайы æрымысыдысты зындгонд политиккы рухс ном

Абон йæ 76 азыл сæмбæлдаид юридикон наукæты кандидат, профессор, барадон хъуыддæгты наукон кусæг æмæ Ирыстоны патриот Къесаты Станислав. Зындгонд юрист у Цæгат Ирыстоны конституцийы автортæй иу. 30 азы бæрц уыд парламенты депутат. 2-æм, 3-æм æмæ 5-æм æмбырдты сæрдары хæдивæг. Къесайы-фырт 1972-ӕм каст фӕци Цæгат Ирыстоны паддзахадон университеты юридикон факультет. Фæстæдæр дзы йæхæдæг кусын райдыдта, сси Паддзахады ӕмӕ барады теори ӕмӕ историйы кафедрӕйы сӕргълӕууӕг. Къесайы-фырт уыд 100 наукон куыстæй фылдæры автор, се ‘хсæн ахуырадон-методикон æрмæджытæ дæр. Студенттӕ йын дис кодтой йӕ зонындзинæдты суадоныл. Хуыдтой царды фӕндагамонӕг. Фæлæ йæхи цард дæргъвæтин нæ рауад. Йæ 75 азы юбилеймæ иу бон баззад, афтæмæй ацыд йе `цæг дунемæ. уый уыд фарон 15-æм июлы. Абон та йыл хъуамæ сæххæст уыдаит 76 азы. Номдзыд политикы ном æрымысынæн мадзал арæзт уыд Дигорайы, Цæголты Георгийы номыл музейы. Изæрмæ ӕрбацыдысты йæ хæстæджытæ, хицауады уӕнгтӕ, депутаттӕ ӕмӕ ӕндӕр регионтӕй уазджытӕ.