Тхэквондойы галуаны — ирд æнкъарæнтæ. Татамийыл ӕвзонг каратисттӕ ӕвдисынц ӕцӕг тох. Ныхмӕлӕууӕджы архайд рагацау базонын, афоныл хи бахъахъхъӕнын кӕнӕ ныццӕвын. 2 минуты фембӕлды фӕстиуӕг иу уысммӕ дæр рабæрæг вæййы.
Дзӕуджыхъӕуы ерыстӕ каратэйӕ баиу кодтой 14 азы онг кары 200 ӕвзонг спортсмены. Кадджын мадзалы сын арфæйы ныхæстæ загъта физкультурӕ ӕмӕ спорты министры хӕдивӕг Хуадонты Артур.
Спортсментӕ ӕвдисынц сӕ арӕхстдзинад, иуӕй-иутæн ерыстæ сты фыццаг æмæ ахъаззаг. Фембӕлдтытӕ цӕуынц каратэйы æппӕтдунеон федерацийы уагӕвӕрдтӕм гӕсгӕ. Сихъоты Виктория ӕмӕ Карепова Стефания рамбылдтой сыгъзӕрин майдантӕ. Дыууӕйӕ дӕр каратэмӕ ӕрбацыдысты 4-аздзыдӕй. Уӕлахиз ӕнцон нӕ уыд, сӕттынц чызджытӕ.
Цыфӕнды уӕлахиз дӕр у тренеры куысты фӕстиуӕг. Уый канд техникӕмӕ йӕ хъус нӕ дары, фӕлӕ хъомыл кӕны спортсмены сӕйраг миниуӕг — уды тых.
Каратэйæ горӕты ерыстӕ цӕуынц ацы аз фыццаг хатт. Спортивон бӕрӕгбон сарӕзта фӕсивӕдон политикӕ, физкультурӕ ӕмӕ спорты комитет республикӕйы каратэйы федерациимӕ иумӕ.
Каратэ Дзӕуджыхъӕуы йӕ ахадындзинад фылдӕрӕй-фылдӕр кӕны. Организатортӕ зӕрдӕ ӕвӕрынц, ерыстӕ суыдзысты ӕрвылазон. Уӕлахиздзаутӕ та архайдзысты республикӕйы ерысты апрелы кӕрон.
