Æфсæнвæндаджы вокзалы бынативгæ музеймæ æнхъæлмæ каст бирæ адæм. Æмæ уый диссаг нæу. Агитацион поезд иннæ пунктмæ араст уыдзæн сихоры 12 сахатыл. Абон æфсæддон намысы горæт – Дзæуджыхъæу сси Уæрæсейы хъахъхъæнынады министрады акци “Единство в памяти. Сила в подвиге!” -йы архайæг.
Аст тематикон вагоны æмæ сæдæгай экспонаты. Уæлахизæн цы аргъ радтам, уый фенæн ис Фыдыбæстæйы Стыр хæстимæ баст равдысты. Ам ис Рейхстагы сæрмæ цы тырыса æрсагътой, уый хуыз. Инженерон æфсæдты экспозицийы – советон æмæ уæрæсейаг рæмудзæн æрмæджытæ. Уымæй уæлдай ма наукон бакуыстытæ – дронтæ. Ныхмæлæууæгæн æнæуынгæ сты. Уый тыххæй æрбацæуджытæн дзурынц лектортæ – сæрмагонд æфсæддон операцийы архайджытæ.
Музейы ис ист фæсарæйнаг техникæйы экспонаттæ. Сластой сæ сæрмагонд æфсæддон операцийы бынатæй.
Трофейты ‘хсæн Украинæйы æфсæддон тыхтæ Курскы облæстмæ цы техникæйыл бырстой, уыдон. Ракетæты хæйттæ, сæрмгонд уæлæдарæсы элементтæ, дронты сæстытæ. Республикæйы æфсæддон-патриотон хъомылады центры специалист Касаты Аслæнбеджы ныхæстæм гæсгæ, ахæм акцитæ фæсивæды хъомыладæн æнæмæнг хъæугæ сты.
Сæрмагонд акци райдыдта 19-æм апрелы æмæ ахæсдзæн 75 боны. Агитацион поезд бабæрæг кæндзæн 61 регионы. Райсом бынативгæ музей фендзысты Цæцæны республикæйы цæрджытæ.
