Нырыккон домæнтæн дзуапп чи дæтты, ахæм комплкс цæрынæн æмæ ахуыр кæнынæн. Ахæм уыдзæн, проектмæ гæсгæ, Суворовы номыл Цæгат Кавказы училищæ. Арæзтадон куыстытæ сæ тæмæны сты. Фыццаг уал фæнд кæнынц административон корпус, хæрæндон, спортивон комплекс æмæ медицинон пункт саразын. Пъланмæ гæсгæ ма хъуамæ фæзына ноджы иу спорткомплекс, уым сараздзысты бассейн æмæ ихын фæз. Ахуырадзуатæ канд æфсæддон хъуыддæгтыл нæ ахуыр кæндзысты, фæлæ ма фæлвардзысты сæхи алы хуызон спортивон хуызты. Куыд цæуынц арæзтадон куыстытæ, уый сбæрæг кодта не* сфæлдыстадон къорд.
26 объекты, сæ фæзуат 80 мин квадратон метры. Цас егъау уыдзæн ацы бæстыхай, уый фенæн ис макеттæм æркæскæйæ. Ахуырадон-административон корпусы арæзтады æмвæзад ныртæккæ ис 2-æм уæладзыджы. Куыстытæ цæуынц бæлвырд фæткмæ гæсгæ.
Административон корпусы раз аразынц медицинон пункт, йæ фарсмæ уыдзæн дыууæ уæладзыгон æхгæд спортивон комплекс, хæрæндоны та бынат уыдзæн 620 адæймагæн. Нырма уал конд цæуы куыстыты фыццаг къæпхæн. Курсанттæн дзы ахуыр кæнынæн æмæ цæрынæн фæзындзæн æппæт хъæугæ уавæртæ. Зæгъæм хуыссæнуæтты иу корпусы уыдзæн 320 адæймаджы. Æдæппæтæй 4 уæладзыгон бæстыхайы фæзуат уыдзæн 10 мин квадратон метры. Дыккаг корпусы та æрбынат кæндзæн 240 суворовоны. Уый аразын райдайдзысты дыккаг къæпхæны. Иннæ аз сæрды ма ацы ран амайын райдайдзысты иу спорткомплекс. Уыдзæн дзы бассейн æмæ ихыл бырæн фæз. Стадион авналæнтæ – 9100 квадратон метры. Уæлæмхасæн ахуырадæн училищæйы уыдзæн æртæ уæладзыгон корпус, пневматикон тиримæ. Æфсæддон ахуырад райсын кæй фæнды, уыдоны нымæц афæдзæй-афæдзмæ рæзы. Объекты уавæрмæ æркаст Уæрæсейы æдасдзинад хъахъхъæнынады министрады æфсæддон-арæзтадон хайады разамонæг Анатолий Арвеладзе.
Анатолий Арвеладзе: «Сæйрагдæр дзы ахуыр кæндзысты æфсæддонты сывæллæттæ. Æнæмæнг уыдонмæ каст цæудзæн уæлдай æргом. Уыимæ конкурс æмæ фæлварæны хуызы æвзардзыстæм, ахуыр кæнынмæ кæй исæм, уыдоны. Статистикæмæ гæсгæ, Суворовон училищæмæ фæисынц æрмæстдæр æвзаргæ лæппуты».
Объекты арæзтадæн æххуыс кæны Уæрæсейы æдасдзинад хъахъхъæнынады министры фыццаг хæдивæг Цæлыккаты Руслан. Ног ахуырадон уагдон аразынц зæронд бæстыхай раивынæн. Дзæуджыхъæуы Суворовон училищейыл цæуы 100 азæй фылдæр. Уæрæсейы æфсады хуыздæр минæвæрттæн уыд æмæ у хорз куырдадз.
Хетаг Плиев
