Ног ахуырадон азмæ цæттæ. Дзæуджыхъæуы бирæвæрсыг техникумы цæуынц цалцæггæнæн куыстытæ. Ахуырадон уагдон аив кæнынц студенттæ æмæ сæ разамонджытæ.
Æрæджы дæр ма студенттæ бадтысты ахуырты, хъуыстой теоретикон зонындзинæдтæм. Фæлæ сын æрæджы фæзынд æнахуыр гæнæн. Ног ахуырадон азмæ сæ бæстыхай аив кæнынмæ бавнæлдтой сæхæдæг. Къулты сæрст, хуыз æмæ ма суанг дизайн дæр – алцыдӕр æвзæрстой сæхæдæг. Дарддæр та, ахуырты цы базыдтой, уыдонæй пайда кæнын райдыдтой практикæйы хуызы. 30 азæй фылдæр къултæ æмбисмæ уыдысты зæронд хъæдӕрмæгæй арæзт.
Алы курсæн дæр йæхи хæслæвæрд. Алчи дæр сæ хъуамæ æрхъуыды кæна æндæр дизайн. Уыцы куысты сын æдзух æххуыс кæнынц сæ ахуыргæнджытæ.
Уымæй уæлдай ма, техникумы корпусты ивд цæуы хъармгæнæн системæ дæр. Ууыл кусынц иумæйагæй сæ разамонджытимæ.
Ацы аз техникумы фыццæгæм курсмæ райсдзысты 220 адæймаджы. Ноджы ма, ам фæзынд ног здæхт — цалцæггæн машинæтæ аразыны слесарь. Ног ахуырадон азмæ сты æххæстæй цæттæ.
