“Дзурын нӕма зыдтон, фӕлӕ ныв кӕнын уæд дӕр бирӕ уарзтон”, — мысы Кристина Брацук. Уӕдӕй фӕстӕмӕ аивад сси йæ царды иу хай ӕмӕ дуне базоныны мадзал. Культурӕйы колледж каст фӕци куыд нывгӕнӕг-фӕлындӕг ӕмӕ дизайнер, стӕй райста режиссер-ӕвӕрӕджы дӕсныйад. Абон Кристина у нывкӕнынады ахуыргӕнӕг, амоны рӕсугъддзинад лыстӕг хъуыддӕгты фиппайын ӕмӕ хи ӕнкъарынад ӕргом кӕнын.
Уыцы фӕлтӕрддзинад ын фадат дӕтты академион бындур, сфӕлдыстадон методикӕтӕ ӕмӕ сценикон хъуыдыкӕнынады элементтӕ баиу кӕнынӕн. Алы ахуыр дӕр — мидисджын. Йӕ урокты студенттӕ зонгӕ кӕнынц аивады алыхуызон къабӕзтимӕ ӕмӕ базонынц сӕ хъуыдытӕ нывкӕнынады фӕрцы ӕвдисын.
Модерн у 19-æм ӕнусы кӕроны æмæ 20-æмы райдианы аивады тӕккӕ парахатдæр уылæн. Бæрæг дары лӕгъз хӕххытӕ, фӕлмӕн формӕтӕ ӕмӕ декоративон аивдзинадæй. Уыцы стилы нывгӕнджытӕ арӕх се ‘ргом здӕхтой зайӕгойты фӕлгонцтӕм, дидинджытӕм, сылгоймаджы аивдзинадмæ, тырныдтой ӕрдзы фидыц ӕмӕ алыварсы дунейы рӕсугъддзинад равдисынмӕ.
Фæсивæд куы сразӕнгард вӕййынц, уӕд, сæ зонындзинӕдтӕ практикæйыл æвдисын райдайынц. Алчидӕр стиль йӕхирдыгонау ӕмбарын кӕны, фӕлгонцтӕ, хӕххытӕ ӕмӕ композицитӕ ӕвзаргӕйӕ. Иутӕн уый у формӕ агурын, иннӕтӕ фæлварынц дуне куыд æнкъарынц, уый равдисын.
Аудиторийы кӕддӕриддӕр вӕййы куыстадон ӕмӕ уыцы иу рӕстӕг сфӕлдыстадон атмосферӕ. Студенттӕ æрæмбырд сты эскизтыл, ныхас кӕнынц ног хъуыдытыл ӕмӕ уынаффӕ кӕнынц кӕрӕдзиимӕ. Алчидӕр агуры йӕхи мадзæлттæ, ахуыргӕнӕг та лӕмбынӕг кӕсы процессмӕ ӕмӕ сæ раст фӕндагыл саразы. Ӕмӕ кӕд ахуыртӕ иу къорды вӕййынц, уӕддӕр фæсивæдæй алчи райсы йæхи, сæрмагонд урок.
Ныртӕккӕ Кристина Брацук йӕхи зӕрдиагӕй цӕттӕ кӕны конкурс “Афӕдзы ахуыргӕнӕг”-мӕ. Фарон сси лауреат. Уымӕн у фӕлтӕрддзинад райсын, авторы педагогон методикӕтӕ равдисын ӕмӕ профессионалон рӕзт адарддӕр кӕныны фадат. Йе ‘мкусджытӕ ӕмӕ ахуырдзаутӕ бӕрӕг кӕнынц: стыр курдиат, уæрæх авналӕнтӕ ӕмӕ зӕрдиаг архайд баххуыс уыдзысты колледж аккаг хуызы равдисынӕн ӕмӕ ног бӕрзӕндтӕм схизынӕн.
Колледжы ӕдде Кристина ӕххӕст кӕны авторон дизайнерон проекттӕ: аразы сувениртӕ, ныв кӕны дуртыл, кæны чысыл нывтӕ зети ӕмӕ акрилӕй. Уыцы куыстытӕ æвдисынц йӕ аивадон цӕстӕнгас. Ахуыргæнинæгтæн та у дæнцæг — аивады алы хуызты хи кæй ис равдисæн.
