Сергей Меняйло æрныхас кодта ахсджиаг фарстатыл министрадтæ æмæ ведомствæты разамонджытимæ

Республикӕйы вице-премьер Платы Альбинӕ йӕ куысты бынат ныууагъта. Ӕрвылкъуырион аппаратон ӕмбырд райдыдта кадрон фарстатӕй. Сергей Меняйло раарфӕ кодта Платы Альбинæйæн йӕ бавӕрæны тыххӕй республикӕйы райрæзтмæ, радта йын “Ирыстоны намыс”-ы майдан. Ӕмбырды ма ӕрныхас кодтой оперативон уавӕрыл. Ныртӕккӕ “Уӕллаг Ларс”-ы контролон-уадзæн пунктыл ахизынмæ ӕнхъӕлмӕ кӕсы 2 мин уæзласæн машинæйæ фылдӕр. Социалон къабазы сӕйраг темӕ сси ахуырад. Бындурон цалцӕг райдыдта 14 скъолайы ӕмӕ 4 рӕвдауӕндоны. Скъолаты автопаркы ныртӕккӕ ис 165 автобусы, балӕвӕрдтой курдиат ноджы 20 машинӕйы самал кӕныны тыххӕй. Боны фæткы — мадæлон ӕвзаг бахъахъхъӕнын. Скъолайы агъоммӕйы кусæндæтты фӕхъомысджындæр кӕндзысты сывӕллӕтты иронау ахуыр кӕныны куыст. Уæрæсейы фæлхасгæнджытæм цæстдарды управленийы бӕрӕггӕнӕнтӕм гӕсгӕ, эпидемиологон уавӕр у ӕнӕфӕцудгӕ. Карантины респираторон вирусон инфекцийы аххосӕй ӕхгӕд ӕрцыдысты 2 рӕвдауӕндоны. Уый хыгъд ахуыргæнæндæтты рынчынты иумӕйаг бӕрӕггӕнӕн 14%-æй фылдӕр нӕу. Кӕронбӕттӕны сӕргълӕууӕг цалдӕр хӕсы сӕвӕрдта министрадты ӕмӕ ведомствæты разамонджытӕн.