Хуыцъистаты Аскер хырхæй пайда кæнын хорз зоны, фæлæ йæм педагог уæддæр æппынæдзух цæст дары. Дыккагкурсон ахуыр кæны “Хъæддæсныйад æмæ æмæ мебель аразыны” здæхтыл. Афæдзы райдианæй лæппу ног зонындзинæдтæ исы Паддзахадон бирæкъабазон техникумы ахуырадон-кондадон комплексы. Студент куыд зæгъы, афтæмæй факультет æнæнхъæлæджы равзæрста, фæлæ фæстæдæр йæ зæрдæмæ фæцыд. Ныртæккæ дæр заказтæтæ райсы.
Дзырдæн, заказтæ егъау сты. Студенттæ мебель аразынц ахуырдæттæ æмæ офистæн. Стъæлттæ, партæтæ, бандæттæ, скъæппытæ, люстрæтæ аразгæйæ, æрвитынц с практикон ахуыртæ. Техникум æлхæнджытæй курдиæттæ райсы æмæ сæ æрыгон специалисттæ сæххæст кæнынц. Цы фæрæзтæ райсынц, уыдонæй хъæугæ æрмæг балхæнынц æмæ студенттæн дæр мызд бафидынц. Ацы хъуыддаг къухы æнæ бюджеты æххуысæй æфты.
Цалдæр мæймæ фæсивæд куысты сæйраг æууæлтыл фæхæст сты. Æрмæст теори нæ, фæлæ практикæйыл ахуыр кæнынц. Фидæны дæсныйады хи бафæлварыны фадат сæ алкæмæн дæр ис. Ахуырадон-кондадон комплекс техникумы байгом дыууæ азы размæ республикæйы ахуырады министрады хъæппæрисæй. Цыбыр рæстæгмæ ам архайд снывыл кодтой æмæ суанг æппынæдзухы æлхæнджыты дæр ссардтой.
Ныртæккæ паддзахадон бирæкъабазон техникумы бæстыхай цалцæггонд цæуы. Хъуыддагмæ се ‘вæрæн хæссынц студенттæ дæр. Æхсызгон сын у, сæ арæзт дзауматæй ахуырдон кæй аив кæндзысты, уый. Æппæт дæр кæнынц зæрдæргъæвдæй.
Ацы аз Дзæуджыхъæуы паддзахадон бирæкъабазон техникумы кондадон комплекс банымадтой бæстæйы хуыздæрыл. Ахуырдон сси 20-æм æхсæнадон-профессионалон преми “Лидер СПО”-йы уæлахиздзау. Уый практикон здæхтытæ кæй парахат кæнынц, уый тыххæй. Ам цалдæр сты: хъæдгуыст, ПВХ-йæ дзауматæ æмæ мебелы кондад, автосервис, электромонтаж, туризм æмæ уазæгуарзондзинад. Фидæнмæ сым бафтдзæн IT- къабаз.
Техникумы æххæст кæнынц проект “Профессионалитет” дæр. Ахуырдон бадзырдтæ бафыста республикæйы раззагдæр куыстуæттимæ цалдæр здæхты фæдыл. Студенттæ парктикæ цæуынц сæ фидæны куыстдæтджытæм. Хъуыддаджы ахадындзинад бæрæг у, сæйраг пайда та — кадртæй ифтонгдзинад. Æрыгон специалисттæ алы ран дæр хъæуы.
