200 богалы æрбамбырд сты Дзæуджыхъæуы спортивон хъæбысхæстæй сæ тыхтæ бавзарынмæ. Хæххон паддзахадон аграрон университет сæ суазæг кодта. Ам арæзт цæуы Уæрæсейы хъæууон хæдзарады министрады уæлдæр ахуыргæнæндæтты 9-æм сæрдыгон универсиадæ. Ерыстæ бабæрæг кодта не ‘сфæлдыстадон къорд дæр.
Ныхмӕлӕууджы уӕнгты змӕлдӕй асайын ӕнцон нӕу. Хъæуы йын арæхстдзинад, сæрæндзинад æмæ тых. Универсиадæйы фыццаг бон дæр баст у грекъаг-римаг хъæбысхæстимæ. Хæххон паддзахадон аграрон университеты студент Доййаты Арсалан хæцы 63 килограммы уæзы. Йæ ныхæстæм гæсгæ дзы зынæй ницы ис. Æмбулгæ дæр æнцонæй ракодта. Уый та уымæн, æмæ йæхи бæстонæй цæттæ кодта ерыстæм.
Ацы аз Уæрæсейы хъæууон хæдзарады министрады уæлдæр ахуыргæнæндæтты универсиадæ арæзт цæуы Хæххон паддзахадон аграрон университеты. Уазджытæн агасцуйы ныхæстæ загъта нæ республикæйы парламенты сæрдар Тускъаты Таймураз.
Сæ арæхстдзинад æвдыстой 200 архайæгæй фылдæр. Уыдон сты 22 уæлдæр ахуыргæнæндоны минæвæрттæ. Эксперттæ куыд зæгъынц, афтæмæй фæсивæд æвдисынц тынг хæрзхъæд хъæбысхæст.
Дыккаг бон та сæ тыхтæ бавзæрстой уæгъдибар хъæбысæйхæцджытæ. Се ‘хсæн куыд нæлгоймæгтæ, афтæ сылгоймæгтæ дæр. Ныртæккæ сын чысыл рæстæг ис баулæфынмæ. Стæй та ногæй ацæудзысты ерыстæм. Иннæ универсиадæ ацæудзæн июлы райдиан Башкирийы.
