Дзæуджыхъæуы социалон-экономикон райрæзтыл ныхас цыд республикæйæ парламенты Советы æмбырд

Ног национ проект “Инфраструктурæ цардæн” æххæст кæндзысты Дзæуджыхъæу æмæ Заводы поселочы. Йæ сæйраг хæс у, цæмæй цæрæнбынæтты уавæртæ 5 азы фæстæ 30% фæхуыздæр уой. Ныхас цæуы хæдзæрттæ æмæ фæндæгты арæзтад, цæрæнуæтты-коммуналон хæдзарады рацарæзт æмæ æхсæнадон транспорт сног кæныныл. Бæлццæтты ласыны фарста — риссагдæртæй иу у. Уый тыххæй Парламенты Советы æмбырды Милдзыхты Вячеслав радзырдта Тускъаты Таймуразæн. Ныртæккæ депутаттæ цæст дарынц горæты социалон-экономикон райрæзтмæ. Дзæуджыхъæуы сног кодтой трамвайты парк, балхæдтой ног автобустæ. Милдзыхты Вячеславы ныхæстæм гæсгæ, администрацийы стыр æргом здахынц сæрмагонд æфсæддон операцийы архайджытæн æххуысмæ. Сæ цот скъолаты хæрынц лæвар, сывæллæтты рæвдауæндæттæн нæ фидынц. Æрдзырдтой демографийыл дæр. Мæлынад фæкъаддæр, фæлæ гуырынад дæр нæ рæзы. Бирæ адæм лидзынц цæрынмæ стыр сахартæм. Тускъаты Таймураз куыд загъта, афтæмæй гуырынад фæфылдæр кæнынæн республикæ бирæ кæны. Уый хыгъд хъæуы æххуысы ног мадзæлттæ дæр. Ныхас ма цыд туризмыл. Финансон институт “ДОМ.РФ”-имæ арæзт æрцыд горæты сæйраг уынгты туристон код. Бакусдзысты ма навигацийы системæ æмæ арт-объекттæ саразыныл.