Дзæуджыхъæуы ссардтой Уæрæсейы хъæбатыр Тыбылаты Мараты ном

Хъæбатыртæ нæ мæлынц. Мидхъуыддæгты министрады историйы ссардтой Тыбылаты Мараты ном. Мадзалы архайдтой хæстоны хиуæттæ, æфсæддон хæлæрттæ, мидхъуыддæгты министрады ветерантæ æмæ кадетон кълæсты ахуырдзаутæ. Фыдыбæстæ хъахъхъæнæджы царды тыххæй уазджытæн равдыстой документалон киноныв. Экспозицийы та фенæн уыд йæ къамтæ, бузныджы фыстæджытæ æмæ йæ дзаумæттæ. Официалон хайы фæстæ сывæллæттæн радзырдтой не ‘мзæххоны хæстон фæндаджы тыххæй. Тыбылаты Марат Уæрæсейы гвардийы сæрмагонд дæлхайæдты рæнхъыты фыццаг бонтæй архайдта сæрмагонд æфсæддон операцийы бынаты. Йæ хæстæ æххæст кæнгæйæ фæмард Курскы облæсты. Йæ хъæбатырдзинады тыххæй дыууæ хатты радтой Æхсардзинады орде, йæ сæйраг хæрзиуæг та – Уæрæсейы Хъæбатыры “Сыгъзæрин Стъалы”.