Афтæ хъæлдзæгæй – зарджытимæ æмæ æмдзæвгæтимæ сабитæ саккаг кодтой сæ хæлæрттæм хистæр къордæй, цæмæй иумæйагæй сæмбæлой Ногбоныл.
Æххуыс та сын кæнынц се ‘ппæтæн зонгæ Митын Дада æмæ Митæ. Сæ къухты та дедатæ æмæ басылтæ – традицион гуылтæ, балæвар сæ кодтой сывæлæттæн. Æмæ, кæй зæгъынæй хъæуы, бæрæгбоны, æнæмæнг, кæфтытæ.
Æвзонг хæдзаронтæ Ногбоны фæдыл арфæ ракодтой алы къордæн дæр. 46-æм рæвдауæндон “Дюймовочка”-йы ацы бæрæгбон сси традицион. Сывæллæттæ йæм зæрдиагæй фенхъæлмæ кæсынц.
Хъомылгæнинæгтæ сæхи бæстон бацæттæ кодтой. Къуыри мадæлон æвзагыл ахуыр кодтой æмдзæвгæтæ æмæ зарджытæ. Базыдтой бæрæгбоны нысаниуæг дæр. Æрмæг сахуыр кæнынмæ та сæм фæкаст сæ ахуыргæнæг Хетæгкаты Заремæ. Рæвдауæндоны кусы 25 азæй фылдæр. Уый хорз зоны сывæллæтты ирон æвзаг ахуыр кæнынмæ куыд сразæнгард кæнæн ис, уый. Йæ уроктæ ацæуынц хъазты хуызы.
Цымыдисаг мадзалы зæрдиагæй архайдтой ныййарджытæ дæр. Бацæттæ кодтой фынгтæ æмæ костюмтæ. Гуыдиаты Хетæг йæ чызджытæн æхцондзинад æрхæссыны тыххæй уайтагъд сразы Митын Дада суæвын.
Ирон æгъдаумæ гæсгæ Ногбон сбæрæг кæнын хорз æрхъуыды у, ныййарджыты æмæ сабиты зæрдæты æнæмæнг баззайдзæн. Разæй ма ноджы иу бæрæгбон —Цæрвкъахæнтæ. Уымæ дæр афтæ бæстонæй цæттæ кæнынц.
