Ацы элементтæ сты китайаг хъæбысхæсты хуыз Тайцзицюанæй. Йæ дæсныдзинад æвдисы турниры кадджын уазæг Сунь Ву. Ссыди Китайæ делегациимæ, республикæмæ сæ æрбахуыдта спорты министр Хуадонты Артур. Сæйраг нысан — спорты къабазы зонындзинæдтæ æмæ фæлтæрддзинадæй кæрæдзийæн хай кæнын. Мадзалы райдианы Ирыстоны сфæлдыстадон къордтæ уазджыты базонгæ кодтой нæ культурæимæ. Тхэквондойы элементтимæ равдыст та бацæттæ кодтой ушуйы федерацийы хъомылгæнинæгтæ æмæ тхэквондойæ олимпаг резервы скъолайы спортсментæ. Турнир расидтысты бæстæты иудзинад æмæ хæлардзинады нысанимæ.
Ацы ерыстæ хорз фадат сты радон хатт арæхстдзинад равдисынæн, æмгуыст кæнæнæн, ног хæлæрттæ ссарынæн. “Снежный барс” цæуы цыппæрæм хатт. Турнир æрбамбырд кодта 12-æй 17 азы онг лæппутæ æмæ чызджыты. Йæ фæрцы фæфылдæр уыдзæн спорты дæснымæ кандидатты нымæц.
Архайджыты ‘хсæн дуне, Уæрæсе æмæ Европæйы чемпионатты уæлахиздзаутæ æмæ призертæ. Тохтæ цæуынц цыппар сæрмагонд гауызыл. Чи кæй ныхмæ уыдзæн, уый æвзары компьтер. Чызджытæ æмæ лæппутæ хæцынц керуги, зæгъгæ, хуызы. Сæ цæттæдзинад равдисдзысты 20 уæзы категорийы.
Турнир схонæн ис бæрзондтехнологон. Уæлахиздзауты дæр æвзары компьютер. Архайджытыл ис сæрмагонд дарæс, хуыйны добок. Ууыл ма скæнынц протектор, шлем, къæхтыл футтæ — алцыдæр электрон бæрæггæнæнтимæ. Цæфты рæстæг табломæ цæуы сигнал æмæ æвдисы балл. Сæр куы ныццæвай, уæд 3 баллы, риуыл куы сæмбæлай — уæд дыууæ. Аргъ кæнынц цæфы тыхæн дæр. Ныхмæлæудтæм цæст дарынц тæрхонгæнджытæ æмæ тренертæ. Системæ балл куы нæ банымайы, уæд сисынц сырх гæххæтт æмæ хатдзæгмæ ногæй æркæсынц.
Сарæзтой ма дæсынйадæвдисæг ахуыртæ спортсменты реабилитацийы фæдыл, уыимæ ампутанттæн дæр.Сунь Ву тай-чийы зонындзинæдтæй фæхай кодта йæхæдæг. Уый пайда у буарæн æмæ хъуыдыкæнынадæн дæр.
Ахæм мадзæлттæ ахъаз сты архайджыты ‘хсæн хæлар ахастдзинæдтæн. Фыццаджыдæр та, дæсныдзинады рæзтæн. Турнир бацæттæ кодтой национ проект “Демография”-йы федералон проект “Спорт —норма жизни”-йы æххуысæй.
