81 адæймаджы, коронавирус кæмæ рабæрæг, ахæмтæ сæхи дзæбæх кæнынц республикæйы рынчындæтты. Уый тыххæй фехъусын кодтой аппаратон æмбырды. Амыдта йæ республикæйы хицауады сæрдар Дзанайты Барис.
Рынчындæтты бынæттæ фаг ис, фæнысан кодта профилон министр Тебиаты Сослан. Фаг уал сты вакцинæйы препараттæ дæр. Ныхас ма цыд скъолаты цæттæдзинадыл ног ахуыры азмæ. Ныридæгæн конд æрцыдысты нысангонд куыстыты 77%.
Алыбегты Эллæйы ныхæстæм гæсгæ, æмткæй райсгæйæ, арæхдæр чысыл аиппытæ рабæрæг вæййынц районты. Алы бон дæр сæрмагонд къамисы уæнгтæ бæрæг кæнынц куыстыты хæрзхъæддзинад. Зæгъдзыстæм ма уый, æмæ ахуыры фыццаг бон алы скъоладзау дæр райсдзæн лæвар. Хицауады уæнгтæ æрдзырдтой фæлладуадзæн бынæтты тыххæй дæр. Сæ рацарæзт цæттæ у 56%. Дзæуджыхъæуы сæйраг парчы куыстытæ фæуыдзысты 15-æм сентябрмæ. Алагиры æмæ Æрыдоны æппæт куыстытæ конд цæуынц национ проекты фæлгæты. Алагирмæ бацæуæны цалцæгмæ дæр аздæхтой æргом. Бахъæудзæн ын 8 милуан æмæ 700 мин сомы.
