Битарты Вячеслав ма Хицауады хæдзары суазæг кодта Чайковскийы номыл музыкалон скъолайы фортепианойы хайады ахуыргæнинаг Макар Куликовы. Хæрзæрыгон уæвгæйæ, лæппу йæхи иттæг курдиатджынæй равдыста Дыккаг Æппæтдунеон фестиваль «Мариинский – ДЗæуджыхъæу»-ы.
Уый тыххæй йæ схорзæхдждын кодтой Уæрæсейы хицауады сæрдары хæдивæг Ольга Голодецы номæй арфæйы фыстæгæй. Битарты Вячеслав куыд бафиппайдта, афтæмæй курдиатджын фæсивæд Цæгат Ирыстонæн йæ фидæны бындурæвæрæг сты. Хъæугæ мадзæлттæ аразын хъæуы, цæмæй сæ курдиат сæфт ма уа. Макар Куликов куыд загъта, афтæмæй музыкæйы йæхи 3 азы фæлвары. Йæ стырдæр бæллиц у Чайковскийы номыл симфонион оркестры цæгъдын. Уæ зæрдыл уын æрлæууын кæндзыстæм, амынд фестиваль нæ республикæйы сентябры кæрон кæй цыд.
Цæгат Кавказы æрыгон музыканттæ иу сценæйыл сæ арæхстдзинад æвдыстой Гергиты Валериимæ. Цæгат Ирыстонæй фестивалы архайдта дæсаздзыд Макар Куликов. Уый фортепианойыл ацагъта Листы уацмыс «Метель», зæгъгæ.
