Филологон наукæты доктор Тахъазты Федарыл сæххæст 65 азы

4.02.2025 20:27

Абон ын раарфæ кодтой ахуыргæндтæ, фысджытæ, республикæйы уæлдæр хицауад æмæ æхсæнады минæвæрттæ.

Зындгонд ирон ахуыргонд, филологон наукæты доктор, Цæгат Ирыстоны гуманитарон æмæ социалон иртасæнты институты фольклор æмæ литературæйы хайады хистæр зонадон кусæг — Тахъазты Федар бæрæг кæны йæ 65 азы юбилей. Абон ын раарфæ кодтой ахуыргæндтæ, фысджытæ, республикæйы уæлдæр хицауад æмæ æхсæнады минæвæрттæ. Наукæйы къабазы сгуыхтдзинæдты тыххæй Тахъазы-фырт райста республикæйы хицауады, Парламенты æмæ Стыр ныхасы Кады грамотæтæ. Астæуккаг скъолайы фæстæ каст фæцис Цæгат Ирыстоны паддзахадон университеты филологийы факультет. Бирæ азты дæргъы куыста Мæцутæйы, Толдзгуны, Дзæуджыхъæуы скъолаты. Ныффыста бирæ радзырдтæ æмæ æмдзæвгæтæ сывæллæтæн. Сæдæ зонадон куыстæй фылдæры равдыста нæ мадæлон æвзаджы хъомыс. Кæй йыл ис раргом кæнæн цыфæнды хъуыдыйæн дæр. Сарæзта ирон æвзаджы хæдахуыргæнæн чиныг, дыгурон-уырыссаг дзырдуат. Пысылмон дин нæ культурæйы цы бынат ахсы, ууыл стыр иртасæн куыст бакодта. Равзæрста ирон нæмттæ æмæ мыггæгты этимологи. Ратæлмац кодта Хъуыран дыгурон диалектмæ. Тахъазты Федар æрæмбырд кодта Царциаты таурæгътæ дæр. Тагъд рæстæджы рухс фендзæн ахуыргонды радон зонадон куыст.

Предыдущий материал

Премьер Дзанайты Барисы разамындæй арæзт æрцыд хицауады æмбырд

Следующий материал

Цæгат Ирыстоны апрелы райдайдзæн чемпионат “Абилимпикс”-ы регионалон къæпхæн.

Читайте также

Все новости