Курорт “Мамысон”-мæ хæстæг рæстæгмæ баурæдтой зæххы хæйттæ æмæ арæзтадæн бар дæттыны архайд. Ахæм уынаффæ хаст æрцыд хицауады æмбырды. Амыдта йæ премьер Дзанайты Барис. Ацы хъуыды хицауады уæнгты размæ рахаста профилон министр Тедеты Руслан. Йæ аххосаг у туристон-рекреацион хуызы экономикон фæзуат дзы кæй аразынц, уый. Уагæвæрд аххæсдзæн хъæутæ Лисри, Згъил, Къамсхо, Тиб, Уæллаг æмæ Дæллаг Зæрæмæгыл. Ныхас цыд кадрон ивддзинæдтыл дæр. Хицауады æмбырды куыд фехъусын кодтой, афтæмæй йæ куысты бынат суæгъд кодта Мыхуыр æмæ дзыллон коммуникациты комитеты сæрдары хæдивæг Габалты Мæдинæ. Уыимæ ма Санаты Аидæйы ногæй снысан кодтой физкультурæ æмæ спорты министры хæдивæгæй 2026-æм азы 10 февралы онг. Æмбырды ма ныхас цыд чысыл æмæ астæуккаг амалхъомады райрæзтыл дæр. Ацы аз райдайдзысты национ проект æххæст кæнын, йæ хæс – уæлæмхасæн æххуыс бакæнын. Æркастысты ма бинонты фермæты æмæ хъæууонхæдзарадон кооперативты “Агростартап” æмæ “Агропрогресс”-ы материлон техникон базæйы райрæзтæн гранттæ дæттыны æмæ сæрмагонд къамис снысан кæныны фарстатæм.
Ныхас ма цыд бирæфатерон хæдзæртты бындурон цалцæджы программæйыл дæр. Объекттæ æвзардзысты сæ техникон уавæрмæ гæсгæ. Ацы аз куыстытæ фæуынвæнд кæнынц 72 хæдзары. Уыдонæй 32-йы баивдзысты лифтытæ, фæнысан кодта цæрæнуатон-коммуналон хæдзарад, артаг æмæ энергетикæйы министр Таматы Майрæн.
