Дзæнгæрæг, урочы фæудыл дзургæйæ, ныззæлланг кодта, æмæ къласæй бæрзонд пъагонджын лæппутæ рахызтысты, сæ фæдыл чызджытæ дæр, сæ дарæсы æвзарæн нысантæ рæстытæгæнгæйæ. Кадеттæ — алчидæр сæ йæ фидæн æрмæст службæйы уыны. Ногъаты Аминæ йæ ахуыр хъуамæ Мæскуыйы адарддæр кæна, Уæрæсейы слестгæнæн комитеты академийы.
Слестгæнæн комитеты кадетон кълæстæ гимназ “Диалог”-ы ис дыууæ: дæсæм æмæ иуæндæсæм кълæсты. Ахуыр сæ кæны 45 лæппу æмæ чызджы. Æхсæзæм сахаты ‘рдæгмæ скъолайы вæййынц, уымæн æмæ, иумæйаг ахуырадæй уæлдай, хъуамæ райсой æхстыты, криминалистикæйы, хæстрæнхъон цæттæкæнынады, фыццаг медицинон æххуысы æмæ бирæ æндæр зонындзинæдтæ.
“Кадеттæ æрмæст сæ дисциплинæйæ дæр хъуамæ бæрæг дарой”, — зæгъы директор Икъаты Беллæ. Иннæ скъоладзаутæн дæнцæг сты, уый ныр фидарæй зонынц, фæлæ гимназы кълас æмбырд кæнын куы райдыдтой æмæ куыстыл куы ныллæууыдысты, уæд сæм фарстатæ фагæй фылдæр уыд.
Уыди ма-иу сын телемост Дагестаны скъолатæй иуимæ. “Уым дæр ис кадетон кълæстæ æмæ скъоладзауты фæндыд кæрæдзиимæ аныхас кæнын”, — загъта Икъаты Беллæ.
Ныридæгæн фæсивæд æвзæр бæрæггæнæнтæ не ‘вдисынц. “Уæрæсейы Федерацийы слестгæнæн комитеты хуыздæр профилон къласы” æркасты бацахстой æвдæм бынат. Къамис хыгъдмæ иста афæдзы куысты хатдзæгтæ. Уæдæ нæ кадеттæ Кремлы æппæтадæмон хæрзаудæн кафтизæры дæр цалдæр хатты архайдтой.
